Nga Julian Hoxhaj
Qendra e Bashkëpunimit Ndërfetar në Elbasan dhe Kryqi i Kuq Shqiptar nisën një fushatë të përbashkët fondembledhëse, për t’i ardhur në ndihmë popullsisë siriane, kryesisht fëmijëve, të prekur nga tragjedia e luftës. 
Kjo fushatë do të zgjasë 10 ditë dhe do të mbyllet më 14 Janar me Marshimin e Paqes, i cili do të bëhet nën moton: “Jo indiferentizmit por solidaritetit”.
Në takimin e zhvilluar ditën e sotme mes drejtuesve të komuniteteve fetare në Elbasan dhe Kryqit të Kuq, ishin të pranishëm përfaqësues të disa kompanive, të cilat dhanë ushqime, veshmbathje, barna dhe para. I pranishëm ishte Presidenti i Kryqit të Kuq Shqiptar, i cili tha që synimi i këtij aktiviteti është mbledhja e fondeve për fëmijët në Siri. Ai i cilësoi ata si viktimat më të dhimbshme të luftës dhe ftoi qytetarët shqiptarë t’i bashkohen kësaj nisme. Përfaqësuesit e komuniteteve fetare ftuan besimtarët që të kontribojnë për këtë fushatë, e cila do të zgjasë 10 ditë.
