Kompania greke fiton dhe në Paris, merr 44 milion dollarë shpërblim nga Shqipëria

Shqipëria do të duhet të paguajë 44 milion dollarë dëmshpërblim kompanisë greke “Aktor” për mospagesën e punimeve në autostradën Tiranë-Elbasan. Vendimi është marrë nga Gjykata e Parisit, e cila ka lënë në fuqi “gjobën” e Gjykatës Ndërkombëtare të Abritazhit (ICC).
Dënimi lidhet me punimet shtesë në autostradën Tiranë-Elbasan. Arbitrazhi gjeti fajtor shtetin shqiptar për largimin e një kompanie greke, që ndërtoi tunelin Krrabës, por u largua pas rishikimit të projektit për pjesën e shembjeve në Ibë.
Penaliteti financiar është llogaritur në dy pika me segmentet rrugore sipas faturave të pretenduara nga kompania dhe një pikë e tretë që lidhet me shpenzimet e arbitrazhit. Fillimisht kur u prokurua ndërtimi i projektit grekët e AKTOR fituan të vetëm ndërtimin e tunelit dhe më pas ndërtimi i dy loteve të tjera u fitua nga bashkimi i kompanive Copri dhe AKTOR.
Përgjatë zbatimit të projektit u shfaqën një sërë problematikash, si rrëshqitje dherash apo rënie shkëmbinjsh çka solli më pas rritjen e kostove të projektit autostradës dhe nevojën për kryerjen e punimeve shtesë.
Fillimisht procedura u prokurua me 312 milionë dollarë, por që sipas qeverisë Rama që ndoqi edhe punimet përfundimtare kostoja shkoi deri në 450 milionë dollarë. Ecuria e projektit shkaktoi përplasje mes qeverisë dhe kompanisë AKTOR e cila pretendonte se pagesat nuk bëheshin në kohë ndërkohë që ekzekutivi fajësonte kompaninë për zvarritje të punimeve përtej afatit.
Situata e tensionuar bëri që në vitin 2018 kompania AKTOR ta dërgojë çështjen në arbitrazhin ndërkombëtar.