Kryetari i grupit parlamentar i Partisë Demokratike, Enkelejd Alibeaj, ditën e sotme ankimoi vendimin e gjykatës për miratimin e Statutit të Sali Berishës. Në lidhje me ankimimin ka reaguar Grupi i Rithemelimi, ku me anë të një deklarate për mediat, shprehen se Alibeaj është shkarkuar si nënkryetar i PD-së në Kuvendin e 11 dhjetorit 2021 dhe kësisoj nuk është i mandatuar për të ndërmarr veprime në emër të partisë. Sipas tyre kërkesa ankimore është paraqitur nga persona të palegjitimuar të bëjnë ankim kundër vendimit të mësipërm të gjykatës.
“Nga mediat jemi vënë në dijeni që nën emrin e Partisë Demokratike është paraqitur një kërkesë ankimore kundër vendimit nr.1346/222 dt.25.03.2022 të Gjykatës së Rrethit Gjyqësor Tiranë nënshkruar nga Enkelejd Alibeaj. Së pari, sqarojmë se askush nuk mund të ndërmarrë veprime në emër të Partisë Demokratike. Kuvendi Kombëtar i PD dt.11 dhjetor 2021, ka mandatuar si të vetmin organ drejtues të Partisë Demokratike Komisionin e Rithemelimit të Partisë. Gjithashtu, Kuvendi ka shkarkuar Z. Alibeaj si nënkryetar i Partisë Demokratike. Pra, nuk përfaqëson PD në asnjë marrëdhënie me të tretët. Së dyti, për sa i takon kërkesës ankimore, ajo është paraqitur nga persona të palegjitimuar të bëjnë ankim kundër vendimit të mësipërm të gjykatës” – thuhet në reagimin e Komisionit të Rithemelimit.
Në deklaratën e Komisionit të Rithemelimit duke iu referuar Kodit të Procedurës Civile, shprehet se vetëm palët ose pjesëmarrësit e tjerë në proces mund të bëjnë ankim dhe askush tjetër. Po sipas tyre, Ky gjykim është zhvilluar konform procedurës pa të paditur, pa persona të tretë dhe pa asnjë pjesëmarrës tjetër. Grupi i Rithemelimit udhëzon edhe Sekretarinë e Gjykatës ku shprehet se ka detyrimin t’ua kthejë apelimin mbrapsht konform kritereve të Kodit të Procedurës Civile
“Kodi i Procedurës Civile përcakton:
Neni 442/a
Ankimi
“Ankimi është akti me të cilin palët ose pjesëmarrësit e tjerë në proces parashtrojnë kundërshtimet e tyre ndaj vendimit të gjykatës dhe veprimeve të përmbaruesit gjyqësor, për të mbrojtur të drejtat dhe interesat e tyre”.
Pra, vetëm palët ose pjesëmarrësit e tjerë në proces mund të bëjnë ankim. Askush tjetër.
Me “palë“ kuptohet i padituri dhe personi i tretë. Me “pjesëmarrës te tjerë” kuptohet Avokati i Shtetit, i Popullit ose Prokurori atëherë kur ligji ua detyron pjesëmarrjen në një proces civil.
Ankimuesi, në këtë rast, nuk ka qenë as palë e as pjesëmarrës në proces dhe nuk plotëson asnjë nga kriteret legjitimues për tu ankuar. Ky gjykim është zhvilluar konform procedurës pa të paditur, pa persona të tretë dhe pa asnjë pjesëmarrës tjetër. Vetëm me “kërkues” Komisionin e Rithemelimit të PD. Njëlloj si në të gjitha rastet e tjera të këtij tip procesi. Në këto kushte, Sekretaria e Gjykatës ku është paraqitur kërkesa ka detyrimin tua kthejë mbrapsht atë komform kritereve të Kodit të Proçedurës Civile” – thuhet në reagimin e Komisionit të Rithemelimit.
Më tej nbë reagim, Komisioni të Rithemelimit denoncon aktin, siç e quajnë ata Basha – Alibeaj, si një përpjekje e Ramës për të mbajtur peng vulën e PD-së.
“Së fundmi, PD denoncon aktin Basha – Alibeaj si përpjekje e dëshpëruar e Edi Ramës për të mbajtur peng vulën e PD kundër vullnetit të shumicës së demokratëve të shprehur qartë në kuvendin e tyre më 11 Dhjetor 2021 dhe të çertifikuar në kutitë e votimit më dt. 6 mars 2022” – mbyllet në reagimi i Komisionit të Rithemelimit.
