Komisioni i Ligjeve ka miratuar me 17 vota pro aktin normativ për vendosjen e maskës me detyrim në ambientet e mbyllura.
Zv.ministrja e Shëndetësisë Mira Rakacolli deklaroi se është parë e nevojshme vendosja e penalitetit pasi edhe pse ishte caktuar si rregull edhe më herët, ai nuk zbatohej.
“Ka të bëjë me vendosjen në mënyrë të detyruar të maskës dhe vendosjen e një lloj penaliteti prej 2 mijë lekësh për ata që nuk e respektojnë. Është bërë e domosdoshme vendosja e penalitetit pasi edhe pse më herët ka qenë rregull vendosja e maskës, ai nuk respektohej. Janë shtruar rastet e shtruara në spital dhe i atyre që kanë nevojë për kujdes intensiv. Për këtë arsye e kemi ndjerë të nevojshme që një nga masat është taksimi i detyrueshëm i vendosjes së barrierës mbrojtëse që ul rrezikun infektimit deri në 70%. Përfshirja në akt normativ dhe vendosja e penalitetit për ata që nuk e respektojnë në ambientet të mbyllura do të çojë në frenim të pandemisë dhe një kontroll të sëmundjes”, tha Rakacolli.
Deputetja Vasilika Hysi vlerësoi vendosjen e theksit te përgjegjësia individuale.
“Ka ardhur koha për përgjegjësi individuale. Nëse një personi nuk i dhemb xhepi i vet, që nuk do të kuptojë që jeta mbrohet nga një maskë e thjeshtë që nuk kushton asgjë. Edhe në institucionet tona kur ka njerëz që bëjnë kapriço, nuk duhet të paguajë institucioni por vetë individi”, tha Hysi.
