Anëtarët e opozitës në Komisionin Hetimor për Sterilizimin kanë paraqitur dokumentin ku kërkojnë këtë të mërkurë të dëshmojë Edi Rama në cilësinë e Kryeministrit i cili ka firmosur VKM-në për dhënien me konçension të këtyre shërbimeve duke mbështetur e promovuar publikisht këto konçensione edhe pas fillimit të çështjes penale nga organet e drejtësisë.
Në dokumentin e publikuar kërkohet thirrja si dëshmitare po këtë të mërkurë edhe e zonjës Vilma Nushi në cilësinë e pronares së dy kompanive e cila është pjesë e një prej koncesioneve objekt i veprimtarisë hetimore të këtij Komisioni. Deputetët e opozitës kërkojnë paraqitjen e znj. Vilma Nushi e cila është përfituese indirekte dhe direkte 1.5 mln Eurove nga dividenti.
Refuzimi i përsëritur nga ana e anëtarëve të mazhorancës në këtë Komision, për të thirrur si dëshmitarë z. Edi Rama dhe zonjën Vilma Nushi, për anëtarët e opozitës, është tërësisht në kundërshtim me Vendimin e Gjykatës Kushtetuese sa i takon Ligjit për Komisionet Hetimore dhe ligjet në fuqi, thotë Partia Demokratike.
“Komisioni është i detyruar që të thërrasë për të dëshmuar para tij, jo vetëm Z. Edi Rama por të gjithë personat për të cilët anëtarët e opozitës, si inicues të këtij Komisioni, kanë kërkuar që të paraqiten e të dëshmojnë”, thuhet në dokumentet e publikuara.
Beqaj sërish në komision
Ish-ministri i Shëndetësisë Ilir Beqaj pritet të rikthehet sërish këtë të mërkurë për të dëshmuar në komision pas dështimit të seancës së djeshme.
I rrethuar nga policët dhe me xhaketën e hedhur mbi kyçe që të mos i dukeshin prangat, Ilir Beqaj kaloi dje pragun e Kuvendit, këtë herë jo si deputet, siç ishte mësuar prej vitesh, por si dëshmitar i thirrur në Komisionin Hetimor të koncensionit të sterilizmit.
Teksa Beqaj ngjiste shkallët e Kuvendit, në komision kishin nisur debate, ku demokratët parashtruan kërkesën e tyre të përsëritur, shtyrjen e afatit të punës. I shoqëruar nga uniformat blu, por i pa prangosur, Beqaj zuri vend në sallë dhe parashtroi kërkesën e tij: “Dua të bëj prezantim me video”.
Kjo kërkesë e tij shkaktoi debate mes palëve, duke e futur në ngërç punën e komisionit hetimor.
Për më shumë se 4 orë, Ilir Beqaj qëndroi si spektator në sallë, duke dëgjuar replikat në seri mes anëtarëve të komisionit që hera-herës ishin të tensionuara. Në debat u përfshi dhe ish-ministri, të cilit ende zyrtarisht nuk i ishte dhënë fjala.
“Mos më thuaj mua i shkreti. Nuk dua asnjë konsideratë personale nga ju”, i tha Beqaj kryetares së komisionit Albana Vokshi.
Mungesa e dakordësisë detyroi disa herë kryetaren e komisionit Albana Vokshi që të ndërpriste mbledhjen, por as pushimet e gjata nuk sollën reflektim.
“Mua më vjen keq që e nxorët atë të shkretin nga burgu, me pranga në duar, vetëm për të bërë show. Ju nuk doni dëshmi sepse doni të fshihni vjedhjet e të rritet korrupsioni. E sotmja ishte skenar i përgatitur”, deklaroi Vokshi.
Dëshmia e ish-ministrit të Shëndetësisë, Ilir Beqaj, u shty për të mërkurën pas 9 orë e gjysmë debat mes përfaqësuesve të qeverisë dhe opozitës. Shkak u bë kërkesa e Beqajt për të prezantuar deklaratën para komisionit hetimor për Shëndetësinë në formatin “power point”, por kërkesa u refuzua nga opozita.
