Komandanti i lartë amerikan i NATO-s, Philip Breedlove, thotë se fluksi masiv i refugjatëve në Evropë, po shërben si mbulesë për fshehje të terroristëve dhe kriminelëve.
Ai tha se kjo paraqet rrezik në rritje për sulme të mundshme terroriste.
Breedlove tha para Senatit amerikan, se fushata ushtarake ruse në Siri ka ndikuar në acarimin e situatës së refugjatëve, që po largohen nga lufta civile atje.
Ai ka akuzuar Moskën dhe regjimin e presidentit të Sirisë, Bashar al-Assad, për përdorim të migrimit si armë për të lëkundur strukturat mbështetëse evropiane dhe për të shkatërruar unitetin evropian.
“Ky kriminalitet, terroristët dhe luftëtarët e jashtëm të kthyer, janë pjesë ditore e fluksit të refugjatëve në Evropë”, i tha Breedlove Komitetit të Shërbimeve të Armatosura të Senatit të Shteteve të Bashkuara.
Sipas tij, përdorimi i bombave-fuçi nga Siria nuk ka qëllim ushtarak, por synon terrorizimin e shtetasve sirianë, që ata të shndërrohen në refugjatë dhe të bëhen problem për shtetet e tjera.
