Ministri i Mirëqenies Sociale dhe Rinisë, Blendi Klosi ka deklaruar se paga minimale për efekt të sigurimeve shoqërore pritet të rritet.
“Në javën e ardhshme do të kemi një vendim të Këshillit Kombëtar të Punës, i cili do të vendosë për rritjen e pagës minimale. Paga minimale për punonjësit e administratës është rritur në nivelin 370 mijë lekë të vjetra”, tha Klosi.
Niveli i pagës minimale pritet të arrijë në 23,000-24,000 lekë, i cili aktualisht është 22,000.
Bizneset më parë janë ankuar se rritja e pagës minimale e palidhur me produktivitetin do t’i dëmtojë ata, ndërsa sipas qeverisë, niveli i ndryshimit është i vogël dhe nuk pritet të ndikojë në konkurrueshmërinë e bizneseve.
Rritja e pagës minimale sjell automatikisht dhe atë të pagës maksimale, por rregulli që paga maksimale është sa pesëfishi i asaj minimale është prishur që prej dy vitesh.
