Vetëm pak orë pasi la qelinë ku qëndroi për 24 orë me akuzën e bllokimit të rrugës, ish deputeti i Partisë Demokratike Klevis Balliu i është ribashkuar protestës së banorëve te “Unaza e Re”.
Gjykata dha sot masën “detyrim paraqitje” për ish-deputetin nën akuzën e tubimit të paligjshëm.
Në fjalën e mbajtur gjatë protestës, Balliu shprehet se nuk frikësohet nga arrestimi, pasi në burg e ka çuar Edi Rama dhe jo ligji.
“Në burg ne nuk na çon ligji por Edi Rama. Edi Rama kujton dhe mendon se kjo është çështje e një individi. Mendon se me dy arrestime do t’i frikësojë ata, por nuk e kupton që PD-ja nuk është çështje e dy-tre individëve, por është një ide, një vizion. Ne kemi të drejtën për të protestuar. Si ka mundësi që një projekt që është nën hetim, vazhdon punohet. Gjithë këto forca policie nuk duhet të merreshin me qytetarët e lirë, por me ata që kanë vjedhur 40 milion euro.
Edi Rama mund të na arrestojë, të na fusë në burg, por 1 mijë herë më mirë të shkoj në burg për kauza të drejta. 1 mijë herë shkoj në burg për të mbrojtur qytetarët e lirë. Por kurrë nuk do ta pranoj që të marrë pjesë në karriget e pushtetit të inkriminuar. Më mirë në burg,” shprehet Balliu.
