Kryetari i bashkisë së Kievit, Vitali Klitschko, iu kundërpërgjigj kritikave të presidentit të Ukrainës lidhur me masat për të ndihmuar banorët të përballojnë ndërprerjet e energjisë elektrike.
Sipas mediave të huaja, ai tha se 430 “qendra ngrohjeje” po i ndihmonin banorët të përballonin efektet e sulmeve ruse në termocentralet dhe më shumë se 100 të tjera ishin planifikuar në rast të kushteve ekstreme.
Reagim i Klitschko vjen pasi presidenti Volodymyr Zelensky vuri në dukje javën e kaluar se kishte shumë ankesa për masat e miratuara në kryeqytet.
Shumica e rajoneve anembanë Ukrainës janë ndikuar nga ndërprerjet e energjisë elektrike këtë javë, dhe ndërsa gjashtë milionë personat e prekur aktualisht dhe Zelensky tha se “problemet më të mëdha” ishin në Kiev.
“Nuk dua të përfshihem në beteja politike, veçanërisht në situatën aktuale”, tha Klitschko në një video të postuar në Telegram.
“Kjo është e pakuptimtë. Unë kam gjëra për të bërë në qytet”, citohet të ketë thënë më tej ai.
Ndërkohë sipas operatorit shtetëror të rrjetit të vendit Ukrenergo, Ukraina ka vetëm energji të mjaftueshme për të mbuluar 80% të nevojave të saj për energji elektrike.
Lajmi vjen pas sulmit të shtatë të Rusisë ndaj infrastrukturës energjetike të Ukrainës, si pjesë e një strategjie të re për të thyer moralin. Si pasojë, shkruan Sky News, banorët në Kiev dhe qytete të tjera po jetojnë pa energji dhe ujë – pavarësisht se temperaturat kanë rënë nën zero.
