Kolegji i Posaçëm i Apelimit (KPA) ka shkarkuar këtë mërkurë zyrtarisht gjyqtaren e Gjykatës së Apelit Administrativ, Rilinda Selimi. Sipas KPA, Selimi u konsiderua e papërshtatshme në kriterin e integritetit të figurës, një nga shtyllat e rivlerësimit.
Në përmbledhjen e vendimit të trupit të kryesuar prej Sokol Çomos, me relatorë Rezarta Schuetz dhe anëtarë, Natasha Mulaj, Albana Shtylla dhe Mimoza Tasi u theksuan kontaktet me një person me të shkuar të errët, shtetasin F.D, i cili u konsiderua si kontakt i papërshtatshëm dhe penalizoi gjyqtaren Selimi.
F.D sipas KPA edhe pse ishte dënuar vetëm për “moskallëzim krimi”, kishte qenë i hetuar që prej vitit 2013 për trafik të narkotikëve. Kolegji arsyetoi se kontaktet e gjyqtares me këtë person nuk ishin rastësore, por se ata kishin lidhje familjare. Në fund, Kolegji arsyetoi se gjyqtarja Selimi nuk arrin nivel të besueshëm sa i përket kriterit te “pastërtisë së figurës” dhe se duhej të shkarkohej nga detyra. KPA në të njëjtin vendim rrëzoi kërkimet e Komisionerit Publik në kriterin e pasurisë.
