Ish-deputetja e LSI-së, Floida Kërpaçi në një dalje për mediat ka akuzuar qeverinë se i ka vrarë shpresën rinisë, ndërsa e ka lënë komplet pas dore.
Ajo shprehet se kësaj qeverie të mbështetur të bandat i ka ardhur fundi.
“Dëshmia e vërtetë që Qeveria e ka lënë pas dore rininë. I ka vrarë shpresën. Brezi i ri duhet të ketë arsim cilësor. Kësaj qeverie që mbështet bandat i ka ardhur fundi. Tani i përket rinisë ta bëjë Shqipërinë, shtëpinë tonë.”- u shpreh ajo.
Deklarata e plotë:
Papunësia e të rinjve është shkaku kryesor që po largon të rinjtë nga Shqipëria, thënë troç që po i përzë të rinjtë nga vendi ynë dhe përgjegjësi kryesor është Edi Rama.
Raporti i Organizatës Botërore të Punës ILO, një nga institucionet më të rëndësishme dhe autoritare në botë raporton shifrën tragjike ku Shqipëria mban vendin e parë për papunësinë dhe mos ofrimin e arsimit cilësor.
Asnjë shpresë nuk ka për të rinjtë shqiptarë. Asnjë strategji nuk ka për punësimin e tyre. Asnjë politikë mbështetëse nuk ka për arsimimin e trajnimin e tyre në të gjitha nivelet.
Përkundrazi ka vetëm e thjesht demagogji që thellon krizën e rëndë të të rinjve shqiptarë.
Ka disa pyetje të pakapërcyeshme që kërkojnë përgjigje: Ku janë 300.000 vendet e punës që premtuan?
Ku është karta e studentit? Ku janë 8 kërkesat e studentëve? Ku është shëndetësia falas?
Përgjigja për këto pyetje është :
Qeveria ka bërë zero investime, zero arritje, zero shpresë dhe zero lekë për buxhetin për rininë.
Gjithçka ka qenë mashtrim dhe propagandë, dëshmi e vërtetë se qeveria e ka lënë pas dore rininë, i ka vrarë shpresën dhe i ka imponuar vetëm emigrimin larg atdheut.
Raporti i ILO është një akuzë e qartë për të cilin nuk mund të ketë asnjë justifikim.
Boll më! Kjo tragjedi duhet të marrë fund! Brezi i ri, duhet të ketë arsim cilësor, punësim të mirë paguar dhe shanse të barabarta. Kësaj qeverie që mbështet kriminelët dhe bandat i ka ardhur fundi!
Tani është koha e rinisë për ta bërë Shqipërinë shtëpinë tonë!
