Apeli i GJKKO nuk ka ndryshuar masën e sigurisë për ish-ministrin Lefter Koka, që ndodhet në burg i akuzuar shpërdorim detyre dhe korrupsion pasiv në lidhje me inceneratorët.
Apeli ka lënë në fuqi masën e arrestit me burg, të caktuar më herët nga GJKKO duke mos i dhënë Kokës të drejtën për të lëvizur i lirë.
Njoftimi:
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtari Dhimitër Lara, sot më datë 05.01.2023, zhvilloi seancë gjyqësore për çështjen penale nr. 10/214 akti, datë 28.12.2022 regjistrimi, regjistruar mbi ankimin e personit nën hetim L.K., ndaj vendimit nr. 297 akti, datë 25.11.2022 të Gjykatës së Posaçme të Shkallës së Parë për Korrupsionin dhe Krimin e Organizuar, me objekt “Zëvendësimi i masës së sigurimit personal”dhe vendosi:
– Miratimin e vendimit nr. 297 akti, datë 25.11.2022 të Gjykatës së Posaçme të Shkallës së Parë për Korrupsionin dhe Krimin e Organizuar.
