Gjykata e Posaçme kundër Krimit të Organizuar dhe Korrupsionit ka rrëzuar për herë të tretë kërkesën e ish-ministrit të Mjedisit Lefter Koka, i cili kërkonte një masë më të lehtë sigurie se ajo e arrestit me burg.
Vendimi është marrë nga gjyqtari Erjon Bani, ndërkohë që Kokës i lind e drejta që brenda 5 ditësh të apelojë vendimin në shkallën e dytë të gjykatës.
Ish-ministri i Ramës u arrestua nga SPAK pasi akuzohet si i përfshirë në skandalin e inceneratorëve, konkretisht në atë të Elbasanit. Sipas SPAK, Ministria e Mjedisit, asokohe e drejtuar nga Koka nuk ka kryer veprimet e plota përgatitore për dhënien e koncensionit për inceneratorin e Elbasanit duke e dhënë atë pa garë.
Mbi ish-ministrin rëndojnë akuzat e “Shpërdorimit të detyrës”, “Korrupsionit” dhe atë të “Pastrimit te parave”. SPAK ka vazhduar hetimet në lidhje me tre inceneratorët, por deri më tani Koka duket se është ‘kurbani’ i vetëm i kësaj afere, që është denoncuar vazhdimisht dhe nga partitë e opozitës, ndërsa në kërkim janë Stela Gugallja, Mirel Mërtiri dhe Klodian Zoto të përfshirë gjithashtu në aferë.
