Europarlamentari gjerman, Bernd Posselt, ka kërkuar dorëheqjen e zëvendëskanacelarit austriak, Heinz-Christian Strache, pasi në deklaratën e tij vuri në pikëpyetje shtetësinë e Kosovës.
Sipas Posselt, Austria është një nga shumica e shteteve anëtare të Bashkimit Evropian që ka njohur Pavarësinë e Kosovës dhjetë vjet më parë.
“Njerëz të tillë janë si kali i Trojës i Putinit në BE, sepse Moska po bën gjithçka që mundet për të hedhur poshtë Pavarësinë e Kosovës”, ka thënë gjermani.
Deklarata se “Kosova padyshim është pjesë e Serbisë”, dhe një propozim prej tij, më herët gjatë ditës, për “të drejtën për vetëvendosje” për Veriun e Kosovës, nxitën shumë reagime në Kosovë. Madje, Vjena zyrtare u detyrua të distancohet prej deklaratave të tij.
Ministria e Jashtme e Austrisë i ka quajtur të pamatura këto deklarime të Strache.
