Komisionari i Bashkimit Evropian për çështje financiare dhe ekonomike, Pierre Moscovici, ka kërcënuar me sanksione Panamanë dhe vende të tjera, nëse ato nuk bashkëpunojnë në luftimin e pastrimit të parave dhe shmangies së taksave pas asaj qe u zbulua me rrjedhjen e dokumenteve këtë javë.
Firma juridike Mossack Fonseca, me seli në Panama, ka ndihmuar mijëra njërëz të pasur dhe të njohur dhe koorporata të mëdha, të regjistrojnë kompani dhe llogari të jashtme për shmangie të pagesës së taksave në shtetet e tyre.
Për shkak se në llogaritë e tilla shpesh herë identiteti i pronarit është sekret, ato përdoren edhe për pastrim të parave, ose për pagesë të ryshfeteve.
“Njerëzit janë të ngopur me këto shkelje”, tha Pierre Moscovici.
Ai ka shtuar se “sasia e parave, juridiksionet dhe emrat e lidhura me këtë çështje, janë sinqerisht shokuese”.
Në listën e BE-së për vendet që nuk janë bashkëpunuese në çështjen e taksave, përfshihet Panamaja, prandaj Moscovici ka kërkuar që ky vend “ta rishqyrtoje pozicionin e saj”.
BE-ja duhet “të jetë e gatshme për t’i goditur ato vende me sanksione përkatëse nëse ato refuzojnë të ndryshojnë”, tha Pierre Moscovici.
