Në sesionin përmbyllës të Forumit IX Global të organizuar nga Qendra Ndërkombëtare “Nizami Ganjavi” në Baku të Azerbajxhanit, presidenti Ilir Meta u shpreh se bota po përballet me kërcënimin e rritjes së çmimeve.
Presidenti theksoi se rritja e çmimeve të ushqimeve sjell një kërcënim real në rritjen e varfërisë, që mund të sjellë zi buke, veçanërisht në disa zona të botës, si Afrika, dhe që mund të përshkallëzohet në një krizë të vërtetë humanitare, politike dhe migrim masiv në botë.
“Koha po na mbaron!”, tha Presidenti Meta duke shtuar: “Mësimi i nxjerrë është se popujt që flenë në demokraci, zgjohen në diktaturë”.
Presidenti Meta u ndal dhe tek lufta në Ukrainë, ndërsa u tha të pranishmëve se bota ka nevojë urgjente për paqe dhe siguri.
Ai theksoi se lufta në Ukrainë ka shkaktuar situatën më të rrezikshme dhe më të paqëndrueshme që nga Lufta e Dytë Botërore dhe kjo ka ndikuar rëndë sigurinë në shkallë globale. “Puna për çështjet e sigurisë, duke përfshirë sigurinë e shëndetit, ushqimit ose energjisë, duhet të jetë fokusi ynë për të ardhmen dhe se si mund të ecim përpara”, u shpreh Meta.
