Deklarata e qartë e shefit të Antimafias Italiane, Franko Roberti për trefishim të kultivimit të kanabisit në Shqipëri.
“Në 2013 Guardia di Financa përllogariti që prodhimi ishte 1 mijë ton, vlera bruto e të cilëve shkonte më shumë se 2 miliardë euro. Po të marrim shifrat e publikuara nga Ministria e Brendshme për plantacionet e shkatërruara, duket që mbjelljet kanë qenë më të mëdha se në 2013. Jo gjithçka është kapur, sepse çdo javë dëgjohet se janë zënë ngarkesa të mëdha. Kjo do të thotë se qarkullojnë më shumë se 2 miliardë euro para të pista. Pra, ekziston rreziku se këto para mund të përdoren për të blerë deputetë. Të gjitha këto janë rreziqe të mëdha”, ka thënë ambasadori i OSBE, Bernd Borchardt. Nuk ka asgjë për të keqkuptuar, sepse ai thotë shprehimisht: “Kjo do të thotë që qarkullojnë më shumë se 2 miliardë euro para të pista. Pra, ekziston risku se këto para mund të përdoren për të blerë deputetë”, dhe e ka fjalën për tani e jo për vitin 2013.
“Pati disa keqkuptime nga publiku për këtë deklaratë, që ne e sqaruam përmes një deklarate të OSBE-së në twitter”, tha më vonë ambasadori. Ai sqaroi se bëhet fjalë për vitin 2013, sipas disa vlerësimeve ndërkombëtare që flasin për 1 mijë ton cannabis të shitur, që llogaritur me vlerën e shitjes në tregun europian, janë diku te 2 miliardë euro. Por, në fakt keqkuptimi me ambasadorin nis pikërisht këtu, tek ky sqarim i tij, ku flet për keqkuptime për deklaratën që pati bërë.
Kur flet për shifrat e 2013, të cilat shkojnë në rreth 2 miliardë euro të ardhura nga droga, ambasadori Borchardt, sqaron se nga të dhënat rezulton që pas 2013-ës të mbjellat janë më të mëdha dhe për pasojë edhe të ardhurat që vijnë nga droga janë shumë më të mëdha, pra më shumë se 2 miliardë euro. Dhe e kishte fjalën për tani, jo për vitin 2013.
Deklaratat e tij duket se kundërshtojnë njëra-tjetrën dhe e lënë atë tërësisht të keqkuptuar. Kjo situatë keqkuptimesh me ambasadorin është krijuar pas takimit të tij me ministrin e Brendshëm, Saimir Tahiri. Ka dhe një deklaratë të shefit të Antimafias Italiane që do të ndihmonte për të sqaruar keqkuptimin e keqkuptuar të ambasadorit.
Franko Roberti, erdhi dje në Tiranë për t’u takuar me autoritetet shqiptare për situatën shqetësuese lidhur me kultivimin dhe trafikimin e drogës në Shqipëri. Ai tha dje se është trefishuar sasia e mbjelljes së cannabis-it në Shqipëri dhe e kishte fjalën për tani, jo për vitin 2013. Me siguri ambasadori Borchardt e di që Shqipëria është më e gjelbëruar se kurrë me cannabis dhe se droga që kapet me tonelata të mëdha, nuk e kanë zënë brenda kufinjve të Shqipërisë nga policia shqiptare, por nga policia e vendeve fqinje kryesisht, Italia. Nëse nuk e ka ditur, me siguri është qartësuar nga shefi i antimafias italiane, i cili flet për trefishim të kultivimit dhe trafikimit të cannabis-it në Shqipëri.
Ndaj, ambasadori Borchardt ndoshta duhet të bëjë edhe një deklaratë tjetër për të sqaruar kekuptimin e keqkuptuar të tij nga partitë politike dhe media.
