Në hyrje të Pallatit të Kongreseve, kryetarin “non grata” e priti Belind Këlliçi, madje ai drejtoi edhe kuvendin, fakt që tregon se është më i besuari i Berishës, duke spostuar Nokën e Vokshin.
Deputetë e ish-deputetë të Foltores, që ëndërrojnë t’i zënë vendin plakut “non grata”, thonë se Këlliçi është “postieri” mes Berishës e Ramës, si i vetmi i besuar për dy gjoja armiqtë Berisha-Rama, ngaqë është dhëndër i Artan Shkrelit, krye-drejtorit e krye-bordistit të “Rilindjes”.
Duke pasur këmbët në të dy krahët, “akrobati” Belind Këlliçi ka krijuar dhe privilegjin, të fsheh pasurinë e tij te vjehrri, por dhe pasurinë e vjehrrit te vetja, duke mos bërë deklarimin e të fejuarës Anna Shkreli, lejuar nga shefja e inspektoriatit të pasurive, që është pjesë e PS.
Sipas nenit 7 të Ligjit nr. 9049, deputeti Belind Këlliçi ka detyrim të deklarojë jo vetëm pasurinë e tij, por edhe të bashkëshortes a bashkëjetueses e personave të lidhur familjarisht me të; mirëpo Këlliçi i ka gjetur anën shefes së ILDKPI, për të lënë jashtë formularit Anna Artan Shkrelin.
Nëpërmjet mos deklarimit të pasurive të gruas, Këlliçi i zgjuar Saliut, po fsheh pasuritë e vjehrrit të tij, Artan Shkreli, që është krahu i djathtë i Edi Ramës prej 24 vitesh në jetën private, në kupolën e qeverisë me shumë poste drejtuese paralele e pazare të shumta dhe të pista.
Po si i fsheh? Përveç pasurive të saj, ligji e detyron Anna Shkrelin si bashkëjetuese e deputetit Këlliçi, të deklarojë pasuritë që kanë pasur e kanë, mamaja ish-deputete e PS, ndërsa babai drejtor i lartë nën vartësinë e Ramës, nga viti ‘98 në Ministrinë e Kulturës e deri sot në qeveri.
Sepse vjehrri i tij Artan Shkreli, aktualisht është Drejtor i Institutit të Ndërtimit, ka qenë Këshilltar i Edi Ramës për lejet e ndërtimit, urbanistikën dhe shfrytëzimin e territorit; ka qenë Zv/ministër i Infrastrukturës, Drejtor i Përgjithshëm i Institutit të Monumenteve të Kulturës etj.
Por është dhe anëtar në 8 borde qeverie ku jepen licenca, leje ndërtimi, tenderë rrugësh dhe ku qarkullojnë miliona Euro fonde investimesh buxheti e të huaja, për të cilat shteti e shpërblen.
Konkretisht, deputet Belindi nuk mund të akuzojë vjehrrin e tij për shfrytëzim të pushtetit e buxhetit në mënyrë korruptive, bashkë me Edi Ramën që e ka emëruar kryetar bordi te Drejtoria e Rrugëve, te Kadastra, te Aviacioni Civil, të Shpronësimet e tokave, te Fondi Shqiptar i Zhvillimit, te Hekurudha, si dhe anëtar të KRRT Tiranë e Këshillit Qeveritar të Diasporës.
Ndërsa Belind Këlliçi, një ish- nëpunës i thjeshtë me pagë 300- 400 Euro në Bashkinë e Tiranës, Agjencinë e Turizmit e në PD, ka deklaruar mijëra Euro kursime, toka e pemëtore, makina mbi 15 mijë Euro, llogari bankare e vlerë CASH nga 14 mijë, 15 mijë, 18 mijë e 44 mijë USD.
Për këto pasuri të deklaruara para se të bëhej deputet, thotë se i ka mbledhur nga kursimet e pagës dhe ia ka dhuruar vëllai, kur ka qenë student me të në SHBA, pastaj pak vite emigrant e më pas u kthye në Shqipëri, ku vjehrri i Belindit zv/ministër e punësoi këshilltar të Ballukut.
Demokratët le ta besojnë një deputet “maskë opozitare” si Këlliçi, me gruan këshilltare të Edi Ramës, drejtore e muzeut “Kadare”, zyrtare në Ministrinë e Sipërmarrjes dhe me vjehrrin krye-drejtor e anëtar në 8 borde qeverie, ndërsa vetë bën sikur ulërin kundër korrupsionit që bën mafia e pushtetit, ku vjehrri e bashkëjetuesja e tij janë pjesë e kupolës së aferave.
Ndërsa SPAK, duhet t’i hetojë pasuritë deputetit Këlliçi, duke filluar nga pagesa afro 30 mijë USD në vit, që ka bërë për 4 vite studime të larta te “COPPIN STATE UNIVERSITY” në Baltimore Maryland- SHBA e deri sot. Të tjerat në vijim./Pamfleti
