Komisioni Europian ka hedhur poshtë kërkesën e Holandës për pezullimin e lëvizjes së lirë të qytetarëve shqiptarë në zonën Shengen.
Komisioni është shprehur se pas vlerësimit të situatës aktuale të Shqipërisë, nuk plotësohen mekanizmat për pezullimin e vizave. Ndërkohë në njoftim thuhet se Komisioni do të vazhdojë të monitorojë nga afër përmbushjen e standardeve të liberalizimit të vizave për Shqipërinë.
“Pas një vlerësimi të kujdesshëm të përmbajtjes së njoftimit të marrë nga Holanda dhe bazuar në informacionin në dispozicion dhe të dhënat përkatëse, Komisioni konsideron se në situatën aktuale rrethanat për të nxitur mekanizmin e pezullimit të vizave nuk plotësohen. Komisioni do të vazhdojë të monitorojë nga afër përmbushjen e standardeve të liberalizimit të vizave për Shqipërinë, si dhe pë vendet e tjera që përfitojnë nga udhëtimi pa viza”, citohet nga mediat një zëdhënës i KE.
Në datën 31 maj Holanda i kërkoi Komisionit Europian, vendosjen e vizave me Shqipërinë, por kërkesa nuk është pranuar. Nëse kërkesa e Holandës do të miratohej atëherë pezullimi i lëvizjes së lirë do të bëhej për një afat prej 9 muajsh.
