Ish-eurodeputetja Eva Kaili do të ketë nesër vizitën e parë të fëmijës së saj në burgjet belge. Lajmi u bë me dije nga avokati i saj Michalis Dimitrakopoulos. Siç raporton ERT, Dimitrakopoulos bëri të ditur se në festën e Epifanisë, eurodeputetja greke pritet të ketë një vizitë 3-orëshe nga vajza e saj.
Avokati
Siç sqaroi avokati grek i Kailit, fillimisht klientja e tij nuk u lejua të shihte fëmijën e saj pasi autoritetet pretendonin se për shkak të grevës së punonjësve të burgut nuk ishte e mundur të bëhej një gjë e tillë për momentin, por ai ka një version tjetër.
“Nuk është e vërtetë që Eva Kaili nuk ka dashur ta shohë fëmijën e saj. Shumë punonjës të burgjeve janë në grevë dhe pikërisht për këto arsye aktualisht nuk ka mundësi që ajo të takojë fëmijën e saj, sepse ka të burgosur të tjerë që kanë përparësi ndaj fëmijëve. Kështu dëgjuam”.
Presion?
Dimitrakopoulos vazhdoi të përmendte se autoritetet ndoshta e përdorën fëmijën si mjet presioni për të “thyer” ish-deputetin.
“Më ka shkuar në mendje se po i bëjnë presion që të rrëfejë, prandaj nuk e kanë lënë të shohë fëmijën e saj,”- tha ai. Po ashtu, ai tha se nuk ka prova që dokumentojnë dhe “lidhin” Eva Kailin me paratë dhe ryshfetet në Katar Gate.
Pozicioni i eurodeputetes është shumë i vështirë, pasi akuzat ndaj saj janë të rënda. Rishikimi i kërkesës së saj për t’u liruar nga burgu pritet rreth datës 20 janar. Në të njëjtën kohë, në periudhën e ardhshme priten zbulime të reja për Katargate, që ka prekur Parlamentin Evropian. Sipas La Reppublica, prokurori Michel Clez po e zhvendos hetimin në “Fazën 2”. Shumë shpejt, me siguri pritet që ai të bëjë kërkesë për heqjen e imunitetit të eurodeputetëve Mark Tarabella dhe Andrea Coccolino. Eva Kaili mohon të jetë përfshirë në skandal dhe shprehet se është penduar që i ka besuar “verbërisht”, siç pretendon ajo, partnerit të saj.
Dënim më i rëndë?
Nëse Kaili shpallet fajtore edhe në Greqi, dënimi i dhënë nga autoritetet gjyqësore vendase do të jetë më i rëndë se në Belgjikë ku dënimet për krimet për të cilat ajo akuzohet janë më të buta, duke filluar nga tre deri në maksimum pesë vjet. Në Greqi, Kaili po hetohet nga prokurorët dhe Autoriteti i Pastrimit të Parave. Ata po përpiqen të konstatojnë nëse ajo ka sjellë para të padeklaruara nga jashtë dhe i ka investuar në Greqi dhe në veçanti në pasuri të paluajtshme. Nëse dalin prova që tregojnë për keqbërje dhe ajo shpallet fajtore, ajo mund të përballet me 15 vjet burg. Ajo do të gjykohet fillimisht në Belgjikë dhe më pas në Greqi.
