Presidenti Bujar Nishani ka deklaruar se kandidatura e ministrit të Brendshëm, Fatmir Xhafaj është e papërshtatshme për këtë detyrë.
Në një dalje për mediat Nishani thekson se Kushtetuta nuk ia njeh Kreut të Shtetit refuzimin e kandidaturës së ministrit të Brendshëm.
“Në vlerësimin tim kandidatura e ministrit të Brendshëm është e papërshtatshm, por Kushtetuta nuk ia jep të drejtën Presidentit të Republikës për të refuzuar një ministër. Në rast se Kushtetuta e vendit do t’ia njihte të drejtën Presidentit, unë do ta refuzoja kandidaturën e ministrit të Brendshëm”, tha Nishani. Gjithashtu Presidenti shtoo që kishte ndjekur me shqetësim dëshmitë publike ndaj veprimtarisë së Xhafajt gjatë periudhës së komunizmit.
“Ka pasur dëshmi publike shqetësuese, të cilat akuzojnë kandidaturën e ministrit të Brendshëm për ushtrim dhune dhe torturë gjatë procesit hetimor, jo vetëm ndaj subjekteve që hetohen, por edhe ndaj familjarëve të tyre. Sipas dëshmive të tyre, ky hetim bëhet për shkak të reagimit ndaj subjekteve në hetim për vdekjen e diktatorit. Në këto rrethana, në këtë kontest dhe garancive që duhet të japë personi që do të drejtojë së pari në drejtim të respektimit të lirive, të garantimit të paanshëm të lirive dhe të drejtave dhe posaçërisht në proceseve zgjedhore“, tha Nishani.
Presidenti theksoi se situata para zgjedhore është e tensionuar, ndërsa shpjegon rolin e Ministrisë së Brendshme në gjithë procesin zgjedhor.
“Së pari, gjatë viteve të fundit është konstatuar një politizim i skajshëm i Policisë së Shtetit. Tashmë është adresuar shqetësimi i madh i partnerëve ndërkombëtarë në përmasa shumë shqetësuese që ka marrë trafiku i kanabisit. Konstatimi i lidhjeve të krimit të organizuar me politikë. Gjithë kjo situatë kërkon vëmendje të madhe tek Ministria e Brendshme, sepse ajo ka një rol parësor në menaxhimin e procesit zgjedhor“, u shpreh Nishani.
