Fituesi i zgjedhjeve të 30 qershorit për Bashkinë e Devollit, Eduard Duro ka zgjedhur sot të presë orarin jo zyrtar për tu futur në zyrën e Bashkisë.
Deri pak minuta më parë në zyrën e Bashkisë së këtij qyteti ka qenë kryetari aktual nga radhët e opozitës Bledion Nallbatit. Ndërkohë sapo janë larguar, punonjësit e Bashkisë kanë kyçur dyert pas orës 16:00, orari zyrtar për qëndrimin në punë.
Por Duro duket i bindur në pritjen e tij paqësore, për lirimin e ambienteve dhe hapjen e derës së Bashkisë.
“I kam bërë një kërkesë Nallbatit për lirimin e zyrës, ne po presim që të hyjmë paqësisht. I kam kërkuar gjithashtu Policisë të ndërhyjë dhe asistojë në hapjen e derës së bashkisë”, ka deklaruar Duro.
