Procesi i legalizimit po stërmundon më së shumti banorët e kryeqytetit dhe sidomos ata që kanë hyrje në një pallat, që në fakt vetë objekti nuk është i legalizuar. Në lidhje me këtë çështje ka folur kreu i Kadastrës, Artan Lame, i cili ka treguar procedurat si duhet vepruar për legalizimin e pallateve.
Lame tha se vështirësia më e madhe është organizimi, sepse shpesh herë banorët shkojnë secili veç e veç prandaj nuk mund të sqarohej se cili ishte pronar dhe cili jo. Ai tha se në një pallat të caktuar nuk mund të kryet legalizimi i vetëm një apartamenti, por i të gjithë hyrjeve, pasi vetëm në këtë mënyrë mund të quhet procesi i kompletuar. Ai u shpreh se duhen bërë kontrollet mirë kur vjen puna tek legalizimi pasi ka qiraxhinj që prezantohen si pronarët e apartamenteve. Sipas tij, duhet krijuar një grup dhe përfaqësuesi duhet gjetur patjetër për procedurat pasi nuk ka zgjidhje tjetër.
“Na vijnë veç e veç na thonë pse s’na e bëjnë, çfarë ti bëj unë një njeriu të vetëm? Duhet bërë një grup, të zgjedhin një përfaqësues dhe të ndjekim procedurat. Na ka ndodhur shumë herë me qiraxhinj që prezantohen si pronarët e apartamenteve, duhet ti kontrollojmë shumë mirë, sidomos aty ku nuk janë administratorët fare prezent. Është shumë kollaj të thuhet se bëjnë se duan lekë, mendoni çfarë duhet të kalojnë punonjësit tanë me çdo dokumentacion, ankesat, thojeni në fund të fundit një fjalë të mirë se nuk janë as kalamajtë e mijë as na i dhanë me zor, janë bijtë e këtij vendi. Gjeni një përfaqësues të bëjë letrat se ndryshe nuk bëhet”, deklaroi kreu i Kadastrës.
Teksa Drejtoria e Përgjithshme e Kadastrës ka bërë gati një raport për ndërtimet e shtesave jashtë lejes së ndërtimit që do ti dorëzohet qeverisë, Lame tha se do të merren masa edhe për shtesat pa leje. Ai u shpreh se do të bllokohet çdo lloj dëshire për shtesa për lejet e dhëna vitet e fundit. Sipas tij, do të ndërhyhet tek fenomeni i shkeljes së lejes së ndërtimit pasi është një fenomen i shëmtuar.
