Mediat greke i kanë kushtuar vëmendje të gjerë një rasti të rëndë që ka tronditur opinionin publik në Greqi, lidhur me tentativën e përdhunimit të një vajze 25-vjeçare greke me aftësi të kufizuara në zonën e Kypseli.
I dyshuari është një burrë 64-vjeçar me origjinë shqiptare, i cili aktualisht ndodhet në arrati, ndërsa policia vijon kërkimet për kapjen e tij.
Sipas raportimeve të medias greke Protothema, në dritë ka dalë edhe një dëshmi tronditëse nga vajza e 64-vjeçarit, e cila pretendon se është përdhunuar nga i ati që në moshën 7-vjeçare.
Duke folur për televizionin MEGA, ajo ka rrëfyer se abuzimi ka ndodhur në shtëpinë e tyre në Shqipëri, në një moment kur familjarët e tjerë nuk ndodheshin aty.
“Kur isha 7 vjeçe, babai më përdhunoi një herë. Nuk e denoncova kurrë sepse kisha frikë. Për vite e mbajta këtë si sekret,” – ka deklaruar ajo, duke shtuar se më vonë, kur u përpoq ta përballte të atin, ai e mohoi dhe u përpoq ta paraqiste si të paqëndrueshme mendërisht.
Sipas saj, edhe nëna kishte dijeni për atë që kishte ndodhur, por nuk ndërhyri kurrë, ndërsa pjesa më e madhe e familjes i ka kthyer shpinën pasi ajo vendosi të fliste.
Ndërkohë, rasti më i fundit në Kypseli ka ndodhur mëngjesin e së dielës, kur 64-vjeçari dyshohet se hyri në banesën ku jetojnë dy motra binjake me aftësi të kufizuara, në mungesë të nënës së tyre.
Sipas dëshmisë së kësaj të fundit, ai ngacmoi seksualisht njërën prej vajzave dhe dhunoi fizikisht tjetrën.
Nëna, sapo u kthye nga farmacia, e gjeti burrin mbi vajzën e saj dhe, në përpjekje për ta mbrojtur, e goditi me një tigan. Më pas, ai e sulmoi me grusht dhe u largua me vrap nga banesa.
