Edhe i rrjepin qytetarët me taksa, edhe u marrin buxhetin për platformën online, që nuk ngopet me tendera çdo vit. Kështu, Juliana Memaj, kryebashkiake e Dimalit, ka vulosur një qokë 233 milionë lekë për të mirëmbajtur këtë sistem online. Kjo bashki që ka një numër modest biznesesh do të shpenzojë një super fond për një person që të mirëmbajë sistemin. Më datë 24 tetor të vitit që lamë pas, Memaj ka shpallur tenderin me objekt “Mirëmbajtje e sistemit të integruar informatikë për shërbimet e bashkisë”, me fond limit 233 milionë lekë.
Në dokument specifikohet se kontratat do të zgjasë 4 vjet, çka do të thotë që në çdo vit do të paguhen 58.25 milionë lekë.
Kështu personi që do të mirëmbajë sistemin (që bëhet fjalë për ndërhyrje në rast problemi) do të paguhet të paktën 4.8 milionë lekë në muaj. Kryebashkiakja me këtë rast i ka marrë paratë e buxhetit edhe kryetarit që vjen me zgjedhjet e radhës sepse afati i kontratës e kalon mandatin e saj. Të paktë ta kishte bërë kontratën 2 vjet, sepse teknologjia informatike vjetërohet me ditë, nuk pret 4 vjet.
Shkeljet në procedurë
Tenderi është hartuar me idenë për abuzim me buxhetin. Këtë e tregon mënyra se si Memaj ka zhvilluar procedurat për këtë prokurim. Më datë 8 nëntor 2024 i ka mbyllur afatin për dorëzimin e ofertave dhe në atë ditë është vulosur fati i miliona lekëve.
Nuk i është dashur shumë kohë për t’u marrë me tenderin pasi është paraqitur vetëm firma HELIUS SYSTEMS. Duke u bazuar në rregullat e prokurimit, ju do të mendoni që është pezulluar procedura.
Në fakt, me një ofertë të vetme, Memaj vazhdoi planin dhe më datë 5 dhjetor 2024 ka publikuar kontratën ku tregohet se fituese është shpallur firma HELIUS SYSTEMS, me pronar Alkid Ademin dhe Gjergji Mullën.
Për shkelje të ligjit, Open Data Albania ngriti “Flamurin e kuq”, që tregon riskun e korrupsionit në tender.
Njëri prej pronarëve, Gjergj Mulla është pedagog për informatikën e zbatuar pranë FEUT. Kjo kompani është mjaft e njohur, duke përmendur që në vitin e shkuar përfitoi tendera edhe nga Posta Shqiptare, ku disa prej atyre kontratave përfunduan me ankesa në KPP.
Ndërsa kryebashkiakja është firmë e njohur në SPAK. Në vitin 2022, Gjykata e Beratit përcolli në SPAK vendimin për të hetuar zyrtaren Memaj për “Shpërdorim detyre” dhe “Falsifikim dokumentesh”.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
