Sekretari amerikan i Shtetit, John Kerry, ka dënuar veprimin e ushtrisë ruse për fluturimin e aeroplanëve luftarakë afër luftanijes së Shteteve të Bashkuara në Detin Balltik, duke thënë se incidenti i 12 prillit ishte provokim “i rrezikshëm” dhe “i pamatur”.
Kerry tha se luftanija amerikane që ishte në ujërat ndërkombëtare, mund t’i rrëzonte aeroplanët luftarakë rusë të tipit Su-24, sipas rregullave nderkombetare.
Ai theksoi se ka biseduar me zyrtarët në Moskë dhe shpreson se raste të fluturimeve të tilla nuk do të përsëriten.
Por dje, Ministria e Mbrojtjes e Rusisë e ka mbështetur aksionin e pilotëve rusë, duke thënë se ata kanë respektuar të gjitha rregullat e sigurisë.
Zyrtarët ushtarakë amerikanë thanë se aeroplanët luftarakë rusë nuk ishin të armatosur, por i janë afruar aq afër luftanijes, U.S.S. Donald Cook, sa që kanë krijuar “valë në ujë”.
