Mbledhja e sotme e Kryesisë së Partisë Demokratike, e zhvilluar me dyer të mbyllura, është shoqëruar me debate të forta dhe tone të larta mes drejtuesve të lartë të partisë.
Sipas burimeve nga mbledhja, përplasja kryesore ka qenë mes Flamur Nokës dhe Ervin Salianjit, ndërsa prezent ka qenë edhe kreu i PD-së, Sali Berisha. Pas qëndrimeve publike të mbajtura më herët nga secili në forma të ndryshme, palët janë përballur drejtpërdrejt në tryezën e Kryesisë.
Mësohet se Flamur Noka i është drejtuar Salianjit me akuza të forta, duke i thënë se veprimet e tij “po u shërbejnë atyre që i kanë përballë”.
Nga ana tjetër, Ervin Salianji ka reaguar ashpër, duke i kërkuar Nokës dorëheqjen. “Jep dorëheqjen Flamur, e ke shkatërruar partinë dhe gabimi me Avokatin e Popullit është përgjegjësi e jotja”, mësohet të ketë thënë Salianji gjatë debatit.
Burimet bëjnë me dije se tonet në mbledhje kanë qenë mjaft të larta dhe debatet të ashpra, ndërsa përplasjet kanë vijuar edhe pas këtij momenti. Në një tjetër reagim, Salianji është shprehur se vëmendja e Kryesisë po devijohet nga beteja politike me qeverinë.
“Sot mendova se e kishim mbledhjen për të rrëzuar Ramën, e paskeni me mua. Po e zhvendosni vëmendjen plotësisht nga Rama”, citohet të ketë deklaruar ai.
