Kjo javë e dytë e shkurtit që ka nisur parashikohet të jetë më e ftohta e vitit.
“Java më e ftohtë e sezonit dhe gjithë vitit. Dy javët e tjera presim që temperaturat të ngrihen dhe të jenë në vlera normale sa i përket muajit të shkurtit”, tha për Ora News Anira Gjoni nga Instituti i Gjeoshkencave.
Shqipëria, nga veriu në jug tashmë është përfshirë nga një masë e ftohtë siberiane me temperatura që shkojë deri në -11 Gradë Celcius.
“Dita më e ftohtë konsiderohet dita e hënë. Temperaturat e regjistruara sot në mëngjes ishin më të ulëtat. Edhe dita e nesërme pritet të ketë temperatura pothuajse në këto nivele“, tha meterologia.
Për shkak të uljes se temperaturave, shqetësime përgjatë ditëve të ardhshme pritet të shkaktojnë ngricat.
“Kryesisht në akset rrugore të zonave malore, por nuk mbeten pas edhe qendrat e banuara, zonat urbane”, tha Gjoni.
Ajo shtoi se reshjet e dëborës do të ndërpriten.
“Nesër presim të kemi reshje të dobëta dëbore në pjesën e verilindjes dhe më pak ose shumë lokale në pjesën e juglindjes. Ndërpriten reshjet dhe temperaturat janë nën zero gradë Celcius.”
Ditët e acarta pritet të marrin fund pas të enjtes, ku do të ketë një rritje graduale të temperaturave në të gjithë vendin.
