Rusia, Amerika, Australia, Izraeli, Rumania, Italia zbarkojnë në Tirane për “Internatonal Albanian Brass Festival lll” 23-28 Prill 2018.
Nga data 23-29 Prill 2018 do të mbahet edicioni i tretë i “Festivalit Ndërkombetar të Instrumenteve të Tunxhit” nga Shoqata Artistët Interpretë. Të gjithë artistët e ftuar në këtë edicion, janë mjaft të njohur në të gjithë botën dhe kalendari i tyre është i rezervuar më shumë se një vit më herët. Mësimet që ata mbajnë në vendet ku jetojnë kanë një kosto deri në 750$ ora e mësimit, por gjatë festivalit këto mësime do të jenë falas për të gjithë të interesuarit. Gjatë mbrëmjeve artistët do të luajnë muzikë nga vendet e tyre dhe gjithashtu do të bashkëpunojnë me artistët vendas e të tjerë të ftuar. Këto koncerte nuk do i dedikohen vetëm muzikës klasike, por edhe asaj jazz, funky, moderne etj., duke e zgjeruar mundësinë e informimit, por edhe duke iu përshtatur tregut vendas të muzikës dhe gjithashtu edhe shijeve të një mase të gjerë të publikut.
Artistët e ftuar janë:
Paul Goodchild – Trombist i Parë pranë Orkestrës Simfonike të Sidney
Arkady Shilkloper – Multi-instrumentist Jazz-i, ish pjesëtar në Operan e Balshoit, Moskë dhe tashmë një prej artistëve më në zë të muzikës Jazz e me një kalendar të ngjeshur artistik.
Luca Benucci – Kornist i parë pranë Orkestrës Magio Fiorentino, Itali dhe gjithashtu organizator i Festivalit ndërkombetar “Italian Brass Ëeek”. Promotor dhe pedagog i njohur me një eksperiencë në shumë vende si: New York, Berlin, Kinë e gjetkë.
Gent Shahini – një prej pianistëve Jazz më të mirë në vend, i diplomuar në Pragë, Çeki
Avital Handler / Haim Mazar – Bastubistë pranë Orkestres së Operas së Izraelit të diplomuar në USA. Autor të CD-ve muzikore dhe në shumë regjistrimeve audio në studiot më të njohura në botë.
Kledia Tosha – Pedagoge e pianos prane Liceut Artistik “Jordan Misja”
Katie Cox – e sapo diplomuar në Doktoraturë për në North Carolina, SHBA.
OFFA Brass Quintet – Një ansambël i përbërë nga artistët e Okestrës së Forcave të Armatosura.
Erik Dj – Një prej Dj më të mirë shqiptar, sidomos i muzikës Ballkanike dhe moderne.
Aldi Arrëza – Një prej pianistëve më në zë i muzikës klasike, por edhe asaj moderne. Pianist me kohë të plotë pranë Liceut Artistik “Jordan Misja”.
Arbana Fejzo – Pedagoge e Analizës së Formës dhe Kompozicionit pranë Universitetit të Arteve.
Albanian Brass Ensemble – Ansambël i përbërë nga 13 artistë të rëndësishëm të institucioneve kulturore vend si TKOB, UA, OFFA, RTSH. Artistët e këtij ansambli i kanë dedikuar heroit tonë Kombetar “Gjergj Kastrioti Skenderbeu” suitën nga filmi “Skënderbeu” e kompozuar nga Çesk Zadeja dhe e riaranxhuar në Gjermani.
Albanian Folk Brass – Ansambël i bazuar në këngë tradicionale shqiptare duke i rrisjellë ato në një mënyrë krejt të veçantë.
U.A Brass Band – I përbërë nga studentët e Universitetit të Arteve me dirigjent Artan Liçaj.
Ky festival ka si synim: afrimin e publikut dhe sidomos brezit të ri me artin në një mënyrë krejt të ndryshe, inspirimin e brezit të ri, ngritjen e nivelit artistik në vend, nëpërmjet unifikimit të metodave studimore dhe promovimi i vendit tonë, nëpërmjet këtyre emrave botërorë të artit. Ky aktivitet duke patur kosto të paimagjinueshme dhe të papërballueshme, ka ngritur ura bashkëpunimi midis instutucioneve në vend, ambasadave të akredituara në Tiranë, apo institucioneve kulturore jashtë vendit si: Ministria e Kulturës së Shqipërisë, Universiteti i Arteve, Ambasada Ruse, Ministria e Kulturës së Rusisë, Ambasada e Izraelit, Instituti Italian i Kutlurës, Instituti Rumun i Kulturës, Hammerings Recods Australi.
Një prej projekteve që tashmë ka nisur është edhe mbështetja e kompozitorëve shqiptarë nga “Hamerings Records” Australi, për të kompozuar pjesë të reja duke pasuruar sa më shumë repertorin shqiptar.
Nata e fundit e këtij festivali do të mbahet pranë Liqenit Artificial të Tiranës dhe do të trajtohet si një festë e vertetë me muzikë ballkanike dhe moderne, e luajtur nga Erik-DJ, Albanian Folk Brass, Albanian Brass Ensemble dhe Brass Band i Universitetit të Arteve.
