Mediat serbe i kanë bërë jehonë deklaratës së kryeministrit Edi Rama, i cili një ditë më parë e quajti veten vëlla të Presidentit Aleksandër Vuçiç në konferencën e përbashkët me Albin Kurtin.
Në një artikull të B92 shkruhet se pavarësisht deklaratës ironike, kryeministri Rama ka kërkuar edhe njohjen e Kosovës në mënyrë që shqiptarët të gjejnë paqe. Gjithashtu, në shkrim është vendosur citimi i kryeministrit Rama, i cili tha se kur është me kryeministrin e Kosovës Albin Kurti, duket se është vëlla me të e jo me Vuçiçin.
“Sa i përket serbizmit tim, unë jam më shumë se kaq. Unë jam vëllai i Vuçiçit, por qëndrimi im është se ne nuk kemi nevojë për një Serbi të radikalizuar, sidomos në kontekstin e sotëm. Dhe nëse shihni sasinë e të qeshurave dhe autoironisë kur Unë dhe Kurti jemi bashkë, do të thoni “Nuk është vëllai i Vuçiçit, por vëllai i Albinit, më lër të bëhem vëlla me të dy”, tha Rama.
Rama tha se të gjitha palët në Kosovë duhet të intensifikojnë përpjekjet për integrimin e kësaj pjese të Evropës, pasi është më e prapambetura.
“Zgjidhja përfundimtare është njohja e Kosovës nga Serbia dhe një paqe e drejtë që u përket shqiptarëve të Kosovës”, tha Rama. Rama ndodhet në Prishtinë, ku po zhvillohet mbledhja e tetë e qeverive shqiptare dhe institucioneve provizore të Kosovës, gjatë së cilës janë nënshkruar 19 marrëveshje.
Kryeministri Rama ishte dje në Kosovë bashkë me kabinetin e tij dhe zhvilloi një mbledhje me qeverinë e Kosovës. Në mbledhje u firmosën 19 marrëveshje bashkëpunimi mes dy vendeve.
