Nga Arben Llalla
Në vitin 1976, një murg ortodoks vjen nga Agjios Oros në Athinë dhe me vare goditi statujën antike të Poseidonit që ndodhej në sallonin e godinës së Ministrisë së Arsimit dhe Fesë. Murgu në fjalë e godiste me forcë Poseidonin duke bërtitur: “Poshtë idhujt!”. Ai i copëtoi duart dhe këmbët, tek përdorte varenë e rëndë.
Punëtorët e ministrisë nuk arritën ta ndalnin tërbimin e murgut. Qenë policët ata që bënë të mundur ndalimin dhe arrestimin e tij. Prifti u thoshte policëve gjatë arrestimit se ishte një statujë e idhujve shkatërrues, e neveritshme dhe e turpshme. Sipas tij, ata që e vunë atë në Ministrinë e Arsimit dhe Fesë nuk janë të krishterë…
Gjatë procesit gjyqësor murgu ortodoks nuk shfaqi pendesë, por deklaroi se i vinte turp nga vetja që nuk pati kohë ta copëtonte dhe kokën statujës së Poseidonit. Gjatë procesit gjyqësor ai rrëfeu se kishte në plan për të hyrë natën nga dritarja dhe do t’i vendoste dinamit statujës të Posedonit për ta shkatërruar të tërë dhe bashkë me të do të vdiste edhe ai vetë si Samuili në Gugji. (Poseidoni është Perëndia, e cila qe hidhëruar në Odiseun, sepse ai i pati verbuar të birin, ciklopin Polifem).
Gjykata e dënoi për këtë veprim murgun vetëm me 8 muaj burg, por pas thirrjes së tij për mëshirë u lirua. Murgu ishte frymëzuar si xhihadistë për të shkatërruar statujën antike të Poseidonit nga botimi i një artikulli të Mitropolitit të Follorinës, Agustino Kantioti, i cili shkruante për Zotat dhe poshtërimin e Athinës. Më tej, Mitropoliti në fjalë thoshte se statuja e njërit nga këto Zota ndodhet në oborrin e Ministrisë së Arsimit dhe Fesë në Athinë. Kështu, murgu mori rolin e xhihadistit dhe u nis për në Athinë për të shkatërruar statujën e Poseidonit.
Veprimi i këtij prifti ortodoks ka ngjashmëri me xhihadistët e sotëm të ISIS në Irak dhe Siri, të cilët shkatërruan çdo gjë antike të këtyre vendeve.
Tani lindin pyetjet:
Kush e përhapi i pari xhihadizmin për shkatërrimin e statujave antike?
Përse një murg grek shkatërroi një statujë antike me vlera të larta historike?
Rasti i murgut të ardhur nga Agjios Oros për të shkatërruar veprat e artit antik nuk është rasti i parë në Greqi.
