Mesazh në shishe në 2016
Një shishe në det ka gjithmonë një mesazh dashurie.
“Është shumë më i bukur, edhe kur është i kotë”, thotë Sirano Dë Berzherak në komedinë e Rostandit. Kjo fjali i korrespondon shumë mirë dhe gjestit të të hedhurit një shishe në det: romantike, e pakthyeshme, e kotë. Mundësia që një shishe e hedhur në det në brigjet amerikane të mbërrijë në rivierën franceze duket një ëndërr e parealizueshme.
E megjithatë një e papritur si kjo i ka ndodhur një çifti në Francë. Në 16 shkurt, pensionistët Alen dhe Brixhidë Bartelemi gjatë një shëtitje në plazhin e Buverisë kanë gjetur një shishe që mbante mbishkrimin “Nju Jork Pelaxhic (det i hapur)”, e cila kishte brenda dy letra të rrotulluara. Pasi e morën shishen në shtëpi dhe i hoqën dyllin çifti i të moshuarve nxorri nga shishja dy letrat që ishin në gjendje shumë të mirë, në të parën ishte një vizatim i një pelikani bërë nga dërguesi i mesazhit në shishe, ndërsa në të dytën ishte një letër e shkruar në anglisht që përgëzonte marrësin dhe lexuesin e atyre rreshtave që kishte shtënë në dorë shishen si dhe e ftonte që t’i përgjigjej “ për t’i shprehur së çfarë ndjente dhe t’i shpjegonte se cilat ishin lidhjet e tij (lexuesit të mesazhit) me oqeanin dhe me mjedisin. Autori i letrës saktëson me humor: “Përgjigjuni si të doni, por jo me anë të një shisheje në det, sepse është padobishme”.
Falë adresës së emalit të lënë në shënimin e tij, çifti francez gjeti personin që kishtë lëshuar shishen në det. Ai ishte Xhorxh Buroji, artist, piktor amerikan i mobilizuar në mbrojtje të pelikanëve.
I kontaktuar nga çifti francez, ai iu shpjegoi atyre se e kishte hedhur shishen që në tetor të 2013 nga ishulli i Staten Island i Nju Jorkut. I lumtur, Xhorxh Buroji, deklaroi se ishte i habitur dhe jashtëzakonisht i kënaqur që shishja e tij kishte përshkuar në oqean 5700 kilometra për dy vjet e gjysëm nga brigjet njukorkeze në ato franceze. Dhe akoma më e habitshme: Brixhitë Batelemi që gjeti shishen është edhe vetë piktore.
Çifti francez ka ftuar tashmë për një vizitë piktorin amerikan për të admiruar migrimin e pelikanëve dhe për të parë vendin ku u zbulua shishja e tij.
