Mbi 100,000 refugjatë ukrainas pritet të mbërrijnë në Britaninë e Madhe. Ky është vendimi që pritet të komunikojë sot sekretarja e brendshme, Priti Patel, pas presionit që Britania e Madhe të marrë sa më shumë nga ata që ikin nga lufta në Evropën Lindore.
Skema do të zgjerohet në mënyrë që kushdo që është një prind i moshuar, gjysh apo gjyshe, fëmijë mbi 18 vjeç ose motër ose vëlla i një shtetasi ukrainas që jeton në Britaninë e Madhe, mund të aplikojë për t’u bashkuar me ta.
Një rrugë e re e sponsorizimit të vizave do të krijohet gjithashtu për t’i lejuar bizneset britanike të sjellin ukrainas në MB. Sekretarja e Brendshme, Priti Patel, pritet të japë më shumë detaje në një deklaratë që do të bëjë sot pasdite.
