Në maj të këtij viti ish-efektivi i Komisariatit nr.3 Ludjan Zaimi vrau kolegun e tij të punës Çaush Saliasi, por sot Gjykata e Tiranës ka vendosur për të që të mos i pranojë gjykimin e shkurtuar, që në fund do t’i ulte 1/3 e dënimit përfundimtar. Kjo pasi në dosjen hetimore shkngrihen dyshime se ai e ka planifikuar më përpara vrasjen.
Ngjarja e rëndë ndodhi në ambientet e Komisariatit nr.3 dhe Zaimi akuzohet për “vrasje me dashje e punonjësit të Policisë së Shtetit, gjatë detyrës ose për shkak të saj”. Pas ekspertizave të kryera u arrit në përfundmin se ish-efektivi nuk vuan nga probleme të shëndetit mendor ashtu siç edhe pretendohej, ndaj dhe pritet të marrë jo më pak se tridhjetë vjet ose me burgim të përjetshëm.
Mesazhet
“Ludjan Zaimi nuk ka vuajtur dhe nuk vuan aktualisht nga çrregullime të shëndetit mendor. Prezanton tipare të personalitetit narcistik dhe elemente të stresit pas traumës. Nuk ka vuajtur ndonjëherë nga sëmundje të shëndetit mendor. Ai ka qenë në gjendje të kuptojë dhe të kontrollojë plotësisht veprimet e tij,”-shkruhet ndër të tjera në dosjen hetimore.
Efektivi ka qenë në gjendje që të kuptojë se çfarë ka bërë, madje para se të kryente vrasjen e kolegut, Ludjan Zaimi i ka shkruar dikujt një mesazh me përmbajtje: Do t’ju shkruaj në darkë diçka. Paçim tani… Elio, Eris, Faik, ju lë amanet babin dhe mamin, nëse do të kem mundësi do t’ju ndihmoj. Kur them amanet, duhet ta mbani amanetin. Eljo ose Eris, njëri nga ju, le të bëhet djali i shtëpisë time. Të lutem.
Përveç kësaj Zaimi i ka shkruar edhe një mesazh tjetër shtetasit me iniciale D.C, të cilit i lë amanet personin e afërm të quajtur “D”.
Ish-efektivi i policisë ka vrarë kolegun e tij të punës për shkak të marrëdhënieve gjatë ushtrimit të detyrës.
