Lituania nuk do të importojë më gaz rus për të plotësuar nevojat e saj të brendshme, duke u bërë vendi i parë në Evropë që ka siguruar pavarësinë e saj nga furnizimet ruse. Lajmi u bë i ditur nga ministria lituaneze e Energjisë.
“Nga ky muaj, jo më gaz rus në Lituani”, shkroi presidenti lituanez, Gitanas Nauseda, në një postim në median sociale Twitter. Ai shtoi se vendi i tij po prish “lidhjet energjetike me agresorin”.
Terminali Klaipeda LNG, i quajtur Independence, u përurua në vitin 2014 për t’i dhënë fund një monopoli rus të furnizimit me gaz, të cilin presidentja e atëhershme Dalia Grybauskaite e quajti një “kërcënim ekzistencial” për vendin.
Ministria vuri në dukje gjithashtu se largimi nga furnizimet ruse nënkuptonte se vendi ishte i izoluar nga një kërkesë e fundit nga Rusia për të paguar gazin në rubla.
Presidenti rus, Vladimir Putin, po kërkon nga blerësit e huaj të paguajnë për gazin në monedhën ruse nga e premtja, ose do të përballen me ndërprerjen e furnizimit. Një lëvizje, kjo që kryeqytetet evropiane e kanë refuzuar dhe që Gjermania tha se përbënte “shantazh”.
