“Big Brother VIP” është spektakli i momentit që duket se ka rrëmbyer edhe vëmendjen e politikës.
Pas kreut të Partisë Demokratike Sali Berisha që është pyetur në disa emisione për raportin me këngëtarin Luiz Ejlli, sepse ky i fundit tregoi hapur mbështetjen për liderin e opozitës, këtë herë BBVIP është përdorur nga deputetja e Partisë së Lirisë Monika Kryemadhi për të ironizuar kryeministrin Edi Rama.
Duke folur për përfshirjen e tij në skandalin McGonigal, Kryemadhi tha se për të shkëputur vëmendjen e qytetarëve, Rama është i gatshëm të bëjë çdo gjë, madje edhe të vendosë që finalja e spektaklit BBVIP të zhvillohet një ditë para zgjedhjeve locale të 14 Majit.
Sipas deputetes së PL nuk duhet të çuditemi, nëse Rama ta bëjë këtë gjë në mënyrë që votuesit të qëndrojnë të mbërthyer para ekranit.
“Mos u çudit kur të kesh finalen e Big Brotherit me 13 Maj një ditë para zgjedhjeve me urdhër të Edi Ramës. Që të rrinë shqiptarët të shohin Big Brother”, deklaroi ajo.
Më tej Kryemadhi e kritikoi shefin e qeverisë edhe për faktin se po i fshihet llogaridhënes, por theksoi se ai nuk do t’i shpëtojë drejtësisë amerikane.
“Ky paska qenë guvernatori i rublës. Ka tani tre javë që është zhdukur. I ka ikur zëri. Në çdo argumentim që Rama mundohet me makinën e propagandës e ka të kotë. Kësaj nuk i shpëton dot askush edhe të jetë presidenti i SHBA. Mund të përdorë imunitetin diplomatik për momentin por e ka shumë të vështirë sepse dashje pa dashje gjërat do të jenë si pasqyra, të depërtueshme për t’u parë nga njerëzit. Unë e thashë edhe dje në parlament që do të dalin jo 225 mijë dollarë por miliona lekë të paguara nga Edi Rama”, u shpreh deputetja e PL për PanoramaTV.
