Sulmi i bërë ndaj kryetarit të Partisë Demokratike, Sali Berisha, ka bërë jehonë në mediat në mbarë botën. Gazeta e madhe britanike, Daily Mail, shkruan se lideri i opozitës shqiptare, u sulmua sot teksa po zhvillohej një protestë antiqeveritare në Tiranë. Gazeta thekson se Berisha po marshonte drejt vendit ku po mbahej tubimi, kur u godit nga një 31-vjeçar.
Sipas saj, agresori ka precedentë për dhunë dhe trafik droge.
“Mijëra mbështetës të opozitës u mblodhën në Tiranë teksa Shqipëria mbante samitin e parë mes Bashkimit Europian dhe Ballkanit perëndimor, për të protestuar kundër qeverisë së kryeministrit Edi Rama dhe për të kërkuar zgjedhje të parakohshme”, shkruan gazeta.
Sipas saj, opozita po protestonte ndaj kryeministrit Edi Rama, të cilin e akuzon për korrupsion, por edhe për kostot e larta të jetesës në vend. Gazeta britanike thekson se opozita po protestonte kundër eksodit masiv të rinisë, e cila po braktis vendin.
Çfarë ndodhi sot?
Gerti Shehu, 31-vjeç sulmoi mesditën e sotme kreun e PD-së Sali Berisha, teksa ky i fundit ishte duke marshuar drejt bulevardit “Dëshmorët e Kombit” për të marrë pjesë në protestë. 31-vjeçari goditi me grusht në fytyrë Berishën duke e gjakosur. Ai u ndalua menjëherë nga truprojat e Berishës dhe ndërkohë u dhunua nga mbështetës dhe simpatizantë të PD-së. 31-vjeçari u shoqërua nga policia dhe aktualisht po merr mjekim në spitalin e Traumës, pasi ka dëmtime në fytyrë dhe fraktura në hundë. Oficerët kanë tentuar dy herë për të marrë në pyetje të riun, por për shkak të gjendjes së tij shëndetësore, ai nuk ka dhënë deri tani asnjë dëshmi. Dyshohet se 31-vjeçari vuan nga probleme të shëndetit mendor.
