Autoritetet italiane kanë kapur mëngjesin e sotëm një sasi të madhe droge në brigjet e Barit.
Mediat italiane raportojnë se është kapur 646 kilogram kanabis dhe 250 kilogram hashash, e cila ka ardhur nga Shqipëria. Operacioni u krye nga deti dhe nga ajri prej Guardia di Finanza-s si edhe ushtrisë italiane.
Mësohet se sasia e drogës ishte nisur me 2 motorskafe nga Shqipëria për në Itali, ndërsa gjatë operacionit janë arrestuar në flagrancë dy italianë. Autoritetet italiane raportojnë se sasia e kapur përllogaritet të ketë një vlerë rreth 10 milion euro në treg.
Gjithashtu dyshohet se janë riaktivizuar linjat e trafikut të drogës dhe klandestinëve nga Shqipëria për në Itali pasi vetëm pak ditë më parë u kap në Karaburun një skaf 9 metra i gjatë, i cili u raportua se kishte dërguar me 33 klandestinë kryesisht nga vendet e Lindjes së Mesme.
