Ministri i Jashtëm i Turqisë, Mevlut Cavushogllu gjendet për një vizitë disa ditore në Serbi ku ka dhënë lajmin edhe për investime të mëdha të turqve në shtetin serb. Gjatë fjalimit të tij në Novi Pazar, ku edhe u hap konsullata turke, shefi i diplomacisë turke njoftoi se investitorët turq kanë derdhur rreth 250 milion euro gjatë këtij viti në Serbi dhe plani është që kjo shumë të dyfishohet gjatë viteve në vijim.
Gjatë vitit të shkuar, Serbia dhe Turqia patën një volum shkëmbimesh tregtare prej 1.5 miliard euro, ndërsa serbët do të blejnë nga turqit edhe dronët e armatosur Bayraktar TB2.
Kryediplomati turk tha se në muajt në vijim do të nënshkruhen marrëveshje të tjera mes dy shteteve që do ta rrisin ndjeshëm nivelin e bashkëpunimit dhe të investimeve turke në Serbi duke njoftuar gjithashtu edhe një vizitë të Vuçiçit në Ankara, i cili sipas tij ka marrëdhënie vëllazërore me Erdoganin.
Ky i fundit ka cilësuar vëlla edhe kryeministrin Rama, i cili është shprehur se emrin e pagëzimit e ka “Paulin”. Pavarësisht kësaj, nga raporti vëllazëror Rama-Erdogan, Shqipëria ka përfituar vetëm disa qindra islamistë të Vëllazërisë Myslimane, një pjesë e të cilëve janë zhvendosur tashmë nga Turqia në vendin tonë.
Më herët, 27.al njoftoi për një marrëveshje të tillë, për të strehuar krerët e Vëllazërisë Myslimane të Egjiptit në Shqipëri, pasi Turqia po synon që të rikthejë raportet diplomatike me Egjiptin, i cili e konsideron terrorist këtë grupim. Duke mos dashur t’ia dorëzojë Egjiptit, Turqia gjeti Shqipërinë si strehë për islamistët në fjalë, ndërsa qeveritarët tanë i miklon me deklarata boshe dhe mbështetje për pushtetin personal, fondet e investimeve i çojnë në Serbi.
/27.al/
