Numri i të vdekurve si pasojë e fundosjes së një trageti në lumin Trigris është rritur në 85 persona, ndërkohë raportohet edhe për dhjetra të plagosur.
Trageti mbante 170 pasagjerë për në një ishull të vogël turistik kur u fundos pranë qytetit Mosul të Irakut. Sipas zyrtarëve lokalë, ekipet e shpëtimit deri më tani kanë arritur të nxjerrin nga lumi të paktën 12 të mbijetuar.
Trupat e viktimave janë dërguar në objektet mjekësore në Mosul për analiza forenzike.
Megjithëse nuk ka ndonjë prononcim zyrtar në lidhje me aksidentin, banorët lokalë pohojnë se incidenti me gjasë ka ndodhur për shkak se në traget ndodheshin 170 persona, edhe pse mjeti i lundrimit ka një kapacitet deri në 50 persona.
