“Këtë takim dua ta fiksojmë pikërisht në murin e ndërtesës që përfaqëson pjesën më të vjetër të saj, emblemë e gjallë e stilit barok”, kështu u shpreh Drejtoresha e Përgjithshme e Akademisë së Teatrit “La Scala”, Luisa Vinci, në momentin e pritjes në një vizitë zyrtare të Drejtoreshës së Përgjithshme të TKOBAP, Zana Çela.
“Ne duam të kontribuojmë që Teatri i Operas, Baletit dhe Asamblit Popullor në Tiranë të mund të kthehet në një nga qendrat trajnuese, jo vetëm për artistët shqiptarë, por një qendër ballkanike për të gjithë artistët që duan të kenë karrierë në fushat e ndryshme të artit skenik,” vijoi ajo.
Gjatë vizitës së saj në Milano, Znj.Çela mori vlerësime maksimale në takimet e shumta që pati në Teatrin dhe Akademinë e famshme të La Scala-s.
“Kemi vlerësim maksimal për artistët shqiptarë të Operas dhe do të përkrahim çdo talent të ri shqiptar”, u shpreh Cating Manager i teatrit “La Scala”, Toni Gradsac. “Edhe pse me një rol të vogël, në çelje të këtij sezoni, ne ftuam një nga artistet tuaja, sopranon Enkelejda Kamani në operan “Hänsel und Gretel”, që në tetor do të nisë Akademinë e Teatrit “La Scala”. Vlerësim maksimal dha dhe një nga zërat më famoz të “La Scala-s”, që tashmë jep dhe kontributin e saj si pedagoge, sopranoja Eva May, e cila ishte entuziaste për këtë bashkëpunim.
Drejtori i Përgjithshëm i Teatrit “La Scala”, Alexander Pereira u shpreh entuziast për nismën e projektin “Investing on people”, që ka ndërmarrë Akademia e Teatrit “La Scala” dhe Teatri Kombëtar i Operas, Baletit dhe Ansamblit Popullor në Tiranë.
Vizita e Drejtoreshës së Përgjithshme të TKOBAP, Zana Çela në Akademinë e Teatrit “La Scala” dhe në këtë Teatër, hap zyrtarisht rrugën e ndërtimit të projektit “Investing on people”.
