Dhjetra mijëra qytetarë të Tiranës, të cilës duhet të përdorin autobusët urbane çdo mëngjes, e nisin ditën me kokëçarje dhe nerva të tendosura.
Thuajse të gjithë linjat e urbanëve kanë vonesa, autobusët janë të tejmbushur, ecin ngadalë, nuk kanë pastërti dhe rrallë herë përdorin kondicionerin.
Këto kushte skandaloze i di edhe Bashkia e Tiranës, e drejtuar nga Erion Veliaj. Dhe, ndonjëherë, në fakt shumë rrallë, vartësit e tij dalin të terren për të kontrolluar cilësinë e shërbimit të urbanëve.
Disa dhjetra inspektorë të Agjencisë së Mbrojtjes së Konsumatorëve marrin makinat e tyre dhe dalin në terren, për të mbajtur shënim në blloqe shkeljet e kompanive të autobusëve.
Bashkia shpenzon miliona lekë për pagat e këtyre inspektorëve, për karburantin e mjeteve të tyre, madje edhe për letrat e bojën që ata përdorin gjatë kontrolleve.
E, në fund, pasi konstatojnë shkeljet skandaloze, vendosin ndaj kompanive gjoba aq minimale, sa edhe fatorinot janë të gatshëm të paguajnë për bosët e tyre.
Vetëm 4 mijë ose 5 mijë lekë të reja. Një prej dispeçerëve të linjës së Unazë tregon për “Gijotina” se autobusët e kompanisë së tij e realizojnë shumë 5 mijë lekë në një xhiro në vetëm 3 stacione.
Kaq është gjoba që Veliaj “përkëdhel” kompanitë e autobusëve urbanë. Aq e vogël është kjo gjobë, sa edhe shoqëritë private të urbanëve harrojnë ta paguajnë dhe Bashkia detyrohet t;i drejtohet Gjykatës Administrative për lëshimin e urdhërave të ekzekutimit, pra për detyrimin e kompanive që të paguajnë 5 mijë lekë të reja.
Në ditët e para të Shkurtit 2023, Gjykata Administrative e Tiranës është mbingarkuar me kërkesat e Agjencisë së Mbrojtjes së Konsumatorit të Veliajt për gjobat “5 mijë lekëshe”.
Në 7 Shkurt 2023, gjykata lëshoi urdhërin e ekzekutimit për gjobën 4 mijë lekë të reja ndaj kompanisë “Alba Trans” shpk, e cila operon në linjën e Tiranës së Re.
Gjoba për këtë kompani është vendosur një vit më parë, për shkeljen “mosafishim në mjet i hartës së stacioneve të qëndrimit të autobuzit”.
Në 6 Shkurt 2023, gjykata administrative ka nxjerrë urdhërin e ekzekutimit për dy gjoba 5 mijë lekëshe të pashlyera nga shoqëria “Gerard-A”, e cila operon në linjën e Maternitetit të ri.
Vartësit e Veliajt e kanë gjobitur me vlerë qesharake kompaninë për shkeljet e “mosrespektimit të frekuencës së lëvizjes” dhe për “mospajisje të shoferit me uniformë”.
Shoqëria “Tirana Bus”, e cila operon në linjën e TEG-ut është gjobitur gjithashtu me 5 mijë lekë për mos-respektim të frekuencës së lëvizjes së mjeteve dhe gjykata e ka urdhëruar në 6 shkurt të këtij viti që të paguajë detyrimin pranë Bashkisë së Tiranës.
Për shkelje të ngjashme janë gjobitur me nga 5 mijë lekë edhe kompanitë e tjera; “Tirana Lines”, që operon në linjën e Kombinatit të Auto-Traktorëve; “City Trans” që punon në linjën urbane të Kasharit; “Remi Trans” që udhëton në linjën e Vorës.
Ndërkohë, pas kërkesave të Bashkisë së Tiranës, gjykata administrative pritet të lëshojë urdhëra ekzekutimi të gjobave 5 mijë lekëshe edhe për shoqëritë e tjera, “Green Line” të Unazës dhe “Mag Utilities” që operon në linjën e Kopshtit Zoologjik.
Në të gjitha rastet, gjobat qesharake janë vendosur në fillim të vitit 2022 dhe Bashkia e Veliajt po “lufton” prej një viti me bosët e autobusëve për t’i bindur që t’i paguajnë.
Ndërkohë, qytetatër vijojnë ta vuajnë çdo ditë shërbimin skandaloz urban në rrugët e kryeqytetit.
