Dorëzohet në polici Etleva Kondi, e cila ishte shpallur në kërkim pas urdhrit të SPAK për ta arrestuar në lidhje me skandalin e inceneratorëve, aferë e cila “mori në qafë” ish ministrin Lefter Koka dhe ish deputeti socialist Alqi Bllako.
Mësohet se Kondi ka qenë në Itali për kurim, dhe sapo është kthyer në Tiranë, është drejtuar drejt Policisë së Tiranës, ndërsa për Kondin u dha nga GJKKO masa ‘arrest shtëpie’.
Kondi cilësohet si njeriu ‘kyç’ për inceneratorët, pasi ka qenë anëtare e komisionit të inceneratorëve. Po ashtu mësohet se Kondi ka firmosur dhe për energjinë për inceneratorin e Elbasanit, ndërkohë që refuzoi ftesën e Komisionit Hetimor për të dëshmuar, duke qenë se ishte person nën hetim.
Kujtojmë se Kondi ka qenë nënkryetare e Bashkisë së Durrësit, ku dha dorëheqjen vetëm pak muaj pas detyrës, ndërsa aktualisht akuzohet si e përfshirë në aferën e inceneratorëve.
