Partia Demokratike do të kallëzojë në SPAK kreun e Bashkisë së Fierit, Armando Subashin, pasi sipas selisë blu ka favorizuar kontratën korruptive koncesionare për ndërtimin e inceneratorit të Fierit, duke i shkaktuar miliona euro dëm ekonomik buxhetit të shtetit.
Deputetja e PD-së, Dhurata Çupi akuzoi Subashin se ka ndryshuar disa herë vendin e inceneratorit të Fierit, ndërsa shtoi se ky i fundit refuzoi t’i përgjigjej disa pyetjeve në Komision.
“Kryebashkiku i Fierit ka përgjegjësi direkte për ndryshimin 3 herë të vendit për ndërtimin e incineratorit: Nga fshati Plyk, pastaj në Mbyet dhe më pas në Mbrostar, është një vendim i pajustifikuar që u kushtoi qytetarëve 460 milionë lekë. Në vend që të zgjidhte një pronë shtetërore, pa kosto, Armando Subashi e vuri gishtin tek një tokë private me pronar, shpronësimi i të cilës kushtoi 460 milionë lek. Armando Subashi nuk u dha dot përgjigje disa pyetjeve thelbësore :Përse u perzgjodh një tokë private, duke ndikuar për keq ne buxhetin e shqiptarëve? Perse nuk zbatoi ligjjin për konsultimin publik?Kush ndryshoi destinacionin e tokës finale për ndërtimin e incineratorit, nga tokë arë në tokë truall për t’i rritur çmimin në mënyrë fiktive? Asnjë nga këto veprime nuk bëhet dot pa miratimin e kryetarit të Bashkisë. Është Armando Subashi që ka drejtuar këtë operacion me abuzim 460 milionë lek. Është Armando Subashi që ka lejuar që pasuria publike të jetë si garanci bankare në favor të koncesionarit”, tha deputetja.
Deputetja i bëri thirrje SPAK që të veprojë sa më shpejt, ndërsa denoncimi i Subashit vjen një ditë pasi PD kallëzoi në SPAK deputetin socialist Alqi Bllako, i përfshirë po ashtu tek inceneratorët.
