Zhvillohet ceremonia e nisjes së fazës së dytë të projektit “Në ndihmë të fëmijëve jetimë të Republikës së Shqipërisë” në ambientet e Medresesë Tiranë.
Projekti, tashmë për të dytin vit radhazi, financohet nga Qendra Bamirëse “Mbreti Selman” dhe zbatohet nga Komuniteti Mysliman i Shqipërisë në bashkëpunim me Ambasadën e Mbretërisë së Arabisë Saudite në Tiranë.
Në ceremoninë e hapjes, morën pjesë: Kryetari i Komunitetit Mysliman të Shqipërisë, H. Bujar Spahiu, Ambasadori i Mbretërisë së Arabisë Saudite në Tiranë, z. Fajsal Gazi Hifdhi, Nënkryetari i KMSH-së, z. Lauren Luli, myftinj nga rrethe të ndryshme të vendit ku shtrihet projekti, si dhe familjarë dhe fëmijë përfitues.
Në fjalën e tij përshëndetëse, kryetari Spahiu shprehu vlerësimin për vazhdimësinë e këtij bashkëpunimi me qendrën “Mbreti Selman”. Ai theksoi se për KMSH-në është nder të jetë partner kryesor në mbështetjen e 150 fëmijëve jetimë në 10 rrethe të ndryshme të vendit.
“Bashkëpunimi ynë me qendrën “Mbreti Selman” më shumë se sa një projekt, është një mision i përbashkët për të sjellë dritë dhe shpresë në jetën e kësaj kategorie fëmijësh. Kjo është një përgjegjësi që e mbartim me nder dhe përkushtim.” – u shpreh Kryetari Spahiu.
Ndërsa Ambasadori Hifdhi përshëndeti të pranishmit dhe theksoi se mbështetjet e kësaj natyre janë shprehje e vizionit humanitar të mbretit Selman.
“Kujdesi për jetimët nuk është vetëm detyrë humane, por edhe përgjegjësi morale që na bashkon si kombe dhe si njerëz. Është kënaqësi të shohim se ky vizion përjetohet dhe realizohet edhe në Shqipëri, në bashkëpunim me partnerët tanë të besueshëm,” – tha Ambasadori Hifdhi.
Gjatë ceremonisë foli edhe Myftiu i Beratit, z. Bilbil Talla, i cili ndau disa reflektime mbi zbatimin e projektit.
Po ashtu, në emër të familjarëve dhe famijëve përfitues të këtij projekti, ndanë përshtypjet e tyre një nënë dhe një fëmijë i pranishëm në aktivitetin inaugurues. Ata u shprehën se ndihma financiare mujore ka qenë një lehtësim i madh për familjen, sidomos për përballimin e nevojave bazë të fëmijëve si ushqimi, veshmbathja apo shkolla.
Në përfundim të ceremonisë, u shpërndanë në mënyrë simbolike mbështetjet financiare mujore për muajin Maj. Krahas ndihmës ekonomike, projekti përfshin edhe angazhimin edukativ përmes kurseve javore me fëmijët në myftinitë përkatëse.
