“Një prokurori speciale pranë KQZ–së do të ishte një zgjidhje për të mundësuar ruajtjen e votës në 18 qershor.”
Kryetari i PDIU-së, Shpëtim Idrizi tha se partia e tij do të dyfishojë rezultatin e mandateve në parlament pas zgjedhjeve të 18 qershorit. I ftuar në emisionin “Natë me Xhaxhiun” në News 24, Idrizi foli për kushtet që partia e tij ka për partnerët në koalicion. Padyshim që zgjidhja e Çështjes Çame renditet e para nga kryetari i PDIU-së, i cili thekson se tashmë kjo çështje është një dosje qeveritare, falë edhe kësaj mazhorance.
Idrizi ka theksuar se pika e parë e marrëveshjes me cilëndo parti, do të vazhdojë të jetë zgjidhja e Çështjes Çame. Por, ai ka sqaruar edhe ata që kërkojnë ta cilësojnë PDIU-në si “parti çame” apo “parti nacionaliste”, duke theksuar se PDIU është parti kombëtare dhe patriotike e shtrirë në të gjithë Shqipërinë.
Kreu i PDIU-së ngulmoi që zgjidhja e Çështjes Çame ka hyrë në rrugën e duhur dhe nuk do të ndalet deri në zgjidhjen e plotë të saj. Ai i ka dhënë merita kësaj mazhorance për çfarë është bëri deri tani, duke theksuar se PDIU ka ekspertizën e nevojshme për të avancuar deri në zgjidhjen përfundimtare të Çështjes Çame, si çështje e të drejtave të njeriut.
Referuar pretendimeve të opozitës se zgjedhjet e 18 qershorit do të vidhen apo do të blihen, Idrizi ka një propozim të qartë; një prokurori speciale pranë KQZ-së do të ishte një zgjidhje për të mundësuar ruajtjen e votës në 18 qershor.
Shpëtim Idrizi është shprehur gjithashtu se nuk është kundër votimit dhe numërimit elektronik, por kjo i përket si zgjidhje dy partive të mëdha.
Kreu i PDIU-së ka ritheksuar propozimet e partisë që drejton për Paktin Kombëtar me pesë pika, ku përfshihet kryesisht reforma në drejtësi, integrimi europian, por edhe çështje të tjera themelore për zhvillimin e Shqipërisë.
