Protestat e dhunshme në Francë, shkaktuan dhjetëra të plagosur dhe viktima, ndërsa autoritetet kanë vënë në pranga një prej organizatorëve.
Eric Drouet, mjë prej liderëve, që ka udhëhequr lëvizjen e “Jelekëve të Verdhë”, është arrestuar në Paris, ndërsa mediet franceze raportojnë se ai është vënë në pranga pasi ka organizuar protesta të paparalajmëruara.
Të njëjtat burime bëjnë me dije se ai u arrestua të mërkurën mbrëma ndërsa po shkonte drejt Champs Elysees në Paris, ku e prisnin edhe rreth 50 protestues të tjerë, ndërsa vetë Drouet është shprehur se kishin për qëllim vetëm që të ndezin disa qirinj për njerëzit e plagosur ose të vrarë gjatë protestave në rrugë.
Avokati i Eric Drouet deklaroi se bëhet fjalë për një “arrestim të paarsyeshëm dhe për një praktikë të ndonjë vendi e kohe tjetër.”
Lëvizja e “Jelekëve të Verdhë” nisi në Nëntor si formë kundërshtimi ndaj taksës së karburantit dhe përfundoi si një lëvizje kundër presidentit, Emmanuel Macron dhe politikave të tij në favor të të pasurve, duke degraduar në dhunë e sjellë viktima e të plagosur.
