Xhaxhai i të riut, Artan Zuberi, 28 vjeç, i cili humbi jetën në burgun e “Sremska Mitrovica” në Serbi, Nagip Zuberi ka folur për momentin e arrestimit të nipit si dhe dyshimet e familjarëve për vdekjen e tij.
Ai ka thënë për Telegrafin se Artani ishte arrestuar në kufirin Kosovë-Serbi në Bërnjak pasi po udhëtonte drejt Norvegjisë ku jetonte prej vitesh me familjen e tij.
Sipas xhaxhait të të ndjerit, arsyeja e arrestimit kanë qenë tatuazhet e tij në trup me flamurin kombëtar dhe një një foto me armë kallashnikov në automjetin ku po ai po udhëtonte.
Deklarata
“Arrestimi i Artanit ka ndodhur para një vit e dy muaj, përafërsisht. E familjarët e kanë marr vesh arrestimin e tij diku pas një jave. Pasi e kanë marr vesh që është arrestuar nga policia serbe dhe është në burg për shkak të automjetit, ku e kishte të fotografinë e një arme kallashnikov, familjarët menjëherë kanë shkuar dhe kanë angazhuar avokat nga Norvegjia.
Edukatorja e tij sociale që është që nga fëmijëria, ka intervenuar përmes ambasadës për ta transferuar këndej. Prindërit kishin shkuar në Beograd, kur atij veç iu kish shqiptu dënimi si terrorist shqiptar, për tri vite”, ka thënë ai.
Nagip Zuberi shton se Artani ka vdekur në këtë burg pas torturave që i janë bërë gjatë vuajtjes së dënimit të tij si dhe pas zjarrit që kishte përfshirë burgun më 21 nëntor 2022.
Vdekja
Ai tregoi se kur ka rënë zjarri në këtë burg, tetë orë dyert e pavijonit kanë qenë të mbyllura. Kjo sipas tij është bërë që ai të gjejë vdekjen nga tymi dhe zjarri.
“Më 21 nëntor paska ndodh djegia e burgut në pavijonin numër 2. Ne e kemi lajmëru rastin në Norvegji, pasi Artani është shtetas norvegjez, ka lindur atje. Artani ka pas tatuazh nëpër trup, kallash edhe në kerr po ashtu. Artani ka ardh nga Serbia për në Kosovë. Në kthim ai është kapur nga policia serbe në kufirin Kosovë-Serbi. Artani ka ndërruar jetë më 21 nëntor.
Ai e ka dashur vendin e vet. E ka vizatuar flamurin sipas dëshirës së vet. Si djemtë e rinj që bëjnë tatuazhe. Për mendimin tim ka pas maltretime të mëdha. E fundit ka qenë kur e kanë djeg burgun, e kanë mshel pavijonin numër dy për tetë orë. Aty ka pas dhe të burgosur të tjerë, jo vetëm Artani. Nëpër gazeta, serbët e jepnin lajmin se kinse katër gardianë janë lënduar, e për të vdekur nuk kanë raportuar që ka”, ka thënë xhaxhai i tij, për Telegrafin.
Po ashtu ai tregoi se gjatë vizitave në burg, kanë lejuar vetëm nënën e Artanit, e cila në vizitën e fundit kishte vërejtur një gjendje dobësie te ai.
“Vetëm nëna e tij e ka vizituar në burg të Sremska Mitrovicës në Serbi. Neve na i patën ndaluar vizitat. Edhe nënës së vet dhe babës ia patën ndalu vizitat nja dy-tri herë, me arsyetimin ‘jo nuk është këtu, jo nuk gjendet këtu’. E qisi rrena e manipulime qysh bëjnë ata me politikën e tyre. Kur e kish pa nana e vet për herë të fundit ka qenë shumë i hutuar, sa që shikonte majtas-djathtas, pasi e kanë torturu shumë. E kanë rreh shumë. Nana e vet e ka pyet çka ke, e ai veç ka kqyr anash”, ka thënë ai.
