Është përcjellë sot për në banesën e fundit aktori i mirënjohur i kinematografisë shqiptare Bujar Lako. Trupi i të ndjerit do të prehet në varrezat e Sharrës, Kombinat.
Nuk pati homazhe zyrtare për të, pasi kështu e kishte kërkuar vetë aktori, por një ceremoni të vogël private ku familjarë, miq të afërm e përshëndetën për herë të fundit.
Përmes një postimi në facebook, Bojken Lako djali i aktorit të ndjerë, ka falënderuar të gjithë personat që kanë shprehur ngushëllime për vdekjen e babait të tij Bujar Lako.
“Miq të Bujos, dashamirës, të afërm e shokë. Jemi të prekur pa masë e na keni dhënë mbështetje e emocion të fortë, me ndjeshmërinë që treguat në këto ditë të vështira. Ju falënderojmë shumë. Duam t’ju njoftojmë se ceremonia mortore do të zhvillohet sot në varrezat e Sharrës, në Kombinat, duke u nisur nga shtëpia në “Myslym Shyri” në orën 11.00. Duam t’ju lajmërojmë se ditën e mërkurë dhe të enjte ju presim në ambientet e Hotel Mondial në dy orare: 10.00 me 14.00 dhe pasdite 16.00 me 19.00 për ta kujtuar Bujon dhe për t’ju falënderuar nga afër”, është postimi i Bojken Lakos.
Aktori Bujar Lako u nda dje nga jeta si pasojë e një ataku kardiak.
Shuhet në moshën 68-vjeçare ikona e filmit shqiptar Bujar Lako
