Gjyqtari i Apelit Shkodër Selim Kryeziu është shkarkuar nga detyra nga Komisioni i Pavarur i Kualifikimit.
Pak ditë më parë në seancën e ballafaqimit me KPK-në, gjyqtari Selim Kryeziu u vu përpara dy raporteve negative nga institucionet ndihmëse të procesit të vetingut, ndërsa në seancën e së enjtes Komisioni i Pavarur i Kualifikimit bëri me dije se kishte konfirmuar disa nga shkeljet e gjetura prej ILDKPKI-së dhe DSIK-së.
Selim Kryeziu e ka nisur karrierën në sistemin e drejtësisë në vitin 1998 si gjyqtar në Gjykatën e Librazhdit. Në vitin 2006, ai është emëruar inspektor pranë Këshillit të Lartë të Drejtësisë, ndërsa në vitin 2012 u promovua si gjyqtar në Gjykatën e Apelit të Shkodrës.
Kryeziut i janë gjetur probleme me pasurinë pasi persona të lidhur me të nuk kanë mundur të justifikojnë një shumë prej 20 mijë eurosh që gjyqtari më pas ua kishte marrë borxh. Analiza fianciare për disa vite e nxirrte gjyqtarin me bilanc negativ prej rreth 5.6 milion lekësh. Ai kishte dhe një sërë mosdeklarimesh në vite dhe disa deklarime të pasakta përfshi deklarimin e një çmimi më të shtrejtë për një apartament të marrë nga Enti Kombëtar i Banesave në vitin 2000.
Ndërkohë, përsa i përket raportit të DSIK, gjyqtari Selim Kryeziu akuzohej për tre raste mitmarrje dhe për përfshirje aktive në korrupsion, ndërsa vlerësonte se ai nuk ishte i përshtatshëm për të vijuar detyrën.
Komisioni tha se akuzat e ngritura në raport dhe nga leximi i materialeve të klasifikuara, trupa ishte bindur se raporti qëndronte dhe i kishte kaluar gjyqtarit barrën e provës për këto akuza. Kryeziu i mohoi akuzat. Ai akuzoi një çift prokurorësh se kishin sajuar çdo gjë kundër tij. Sipas tij një prokuror i cili u dërgua nga KPK për rikualifikim për shkak të problemeve të aftësive profesionale, kishte interesa personale, ndërsa tha se një nga akuzueset ishte kushurira e prokurorit.
